Ýaňy ýakynda Türkmenistanyň Magtymguly adyndaky Ýaşlar guramasynyň Lebap welaýatynyň Hojambaz etrap Geňeşi tarapyndan, Hojambaz etrabyň 38-nji orta mekdebiniň mejlisler zalynda Türkmenistanyň Magtymguly adyndaky Ýaşlar guramasynyň Lebap welaýat Geňeşiniň, Lebap welaýat Baş bilim müdirliginiň, Türkmenistanyň Zenanlar birleşiginiň Lebap welaýat bölümi bilen bilelikde Milli bahar baýramy mynasybetli ýurdumyzyň umumybilim berýän orta mekdepleriň 8-12-nji synplarynda okaýan okuwçy gyzlarynyň arasynda geçirilýän “Iň uzyn saçly gyz-2025” atly bäsleşigiň Hojambaz etrap tapgyry geçirildi. Oňa bäsleşigiň mekdep tapgyrynda ýeňiji bolan uzyn saçly gyzlar gatnaşdylar. Bäsleşikde uzyn saçly gyzlar 3 şert boýunça bäsleşdiler. Bäsleşige Hojambaz etrap bilim bölüminiň hünärmeni Möwlýamowa Suraý, Türkmenistanyň Magtymguly adyndaky Ýaşlar guramasynyň Lebap welaýatynyň Hojambaz etrap Geňeşiniň guramaçylyk bölüminiň baş hünärmeni Gunça Saparowa, Çagalar we ýetginjekler döredijilik öýünde tikinçilik gurnagynyň ýolbaşçysy Zülfiýa Jumageldiýewa eminlik etdiler.
Arkadagly Gahryman Serdarymyzyň ýaşlarymyza bildirýän ynamyny ödemek, ösüp gelýän ýaş nesillerimiziň edebiýata, medeniýete, sungata, aýdym-saza, çeper döredijilige, höwesli zehinli gyzlary ýüze çykarmak maksady bilen geçirilen bäsleşikde okuwçy gyzlar türkmen gelin-gyzlaryna mahsus dört örümli uzyn gara saçlaryny, milli lybaslaryny çeper sözüň üsti bilen beýan etdiler.
«Iň uzyn saçly gyz-2025» atly bäsleşiginiň Hojambaz etrap tapgyrynda I orna etrabyň 36-njy orta mekdebiniň 11-nji synp okuwçysy Arzuw Hudaýkulowa, II orna etrabyň 16-njy orta mekdebiniň 12-nji synp okuwçysy Çynar Erkäýewa, III orna etrabyň 12-nji orta mekdebibiň 11-nji synp okuwçysy Roza Azadowa dagylar mynasyp boldular. Bäslikde ýeňiji bolan gyzlara Türkmenistanyň Magtymguly adyndaky Ýaşlar guramasynyň Lebap welaýatynyň Hojambaz etrap Geňeşi tarapyndan Hormat hatlary we ýadygärlik sowgatlar dabaraly ýagdaýda gowşuryldy.
Gunça HATAMOWA,
Türkmenistanyň Magtymguly adyndaky
Ýaşlar guramasynyň Lebap welaýatynyň
Hojambaz etrap Geňeşiniň sanly ulgam
boýunça esasy hünärmeni.
