Ýakynda Türkmenistanyň Magtymguly adyndaky Ýaşlar guramasynyň Lebap welaýatynyň Türkmenabat şäher Geňeşi, welaýat Baş bilim müdirligi hem-de «Dana» bilim merkezi bilen bilelikde guramagynda zehinli ýaşlary ýüze çykarmak maksady bilen, bilim merkeziniň Türkmenabat şäher şahamçasyna gatnaýan okuwçylarynyň arasynda matematika dersi boýunça bäsleşik geçirildi. Bäsleşige zehinli ýaşlaryň 150-den gowragy gatnaşdylar. Bäsleşigiň netijesinde I orna Türkmenabat şäheriniň ýöriteleşdirilen 29-njy orta mekdebiniň okuwçysy Arslan Abdyrasulow, II orna Türkmenabat şäheriniň ýöriteleşdirilen 41-nji orta mekdebiniň okuwçysy Maksat Allaberenow, III orna Türkmenabat şäheriniň ýöriteleşdirilen 28-nji orta mekdebiniň okuwçylary Kerwen Nagymow, Gülbahar Derýaýewa we Türkmenabat şäheriniň 31-nji orta mekdebiniň okuwçysy Esra Rozykulyýewa dagylar mynasyp boldylar. Bäsleşigiň ýeňijilerine hem-de gatnaşyjylaryna Türkmenistanyň Magtymguly adyndaky Ýaşlar guramasynyň Lebap welaýatynyň Türkmenabat şäher Geňeşi, “Dana” bilim merkezi hem-de Lebap welaýat Baş bilim müdirligi tarapyndan hormat hatlary we ýadygärlik sowgatlary gowşuryldy.
Bäsleşigiň ahyrynda oňa gatnaşanlar Türkmenistany bagtly çagalygyň mekanyna öwüren türkmen halkynyň Milli Lideri Gahryman Arkadagymyza, Arkadagly Gahryman Serdarymyza köp sag bolsun aýtdylar.
Ýusup BABAKULOW,
Türkmenistanyň Magtymguly adyndaky
Ýaşlar guramasynyň Lebap welaýatynyň
Türkmenabat şäher Geňeşiniň başlygy.
