Daşoguz welaýatynyň Boldumsaz etrabynyň Gubadag şäherindäki medeniýet merkezinde Türkmenistanyň Prezidentiniň yglan eden «Türkmeniň Altyn asyry» atly bäsleşiginiň çäklerinde ýaş estrada aýdymçylaryň arasynda «Ýaňlan Diýarym – 2025» atly bäsleşiginiň Boldumsaz etrap tapgyry geçirildi. Bäsleşige tomaşa etmäne gelen etrabyň bilim, medeniýet, saglygy goraýyş ulgamlarynyň işgärleriniň hem-de bäsleşige gatnaşýan ýaşlaryň ene-atalarynyň ýüzünde bagtyýarlyk döwrümiziň şatlyk alamatlary duýuldy. Owadan bezelen, altyn öwüşginli ajaýyp sahnada etrabyň oba medeniýet öýleriniň arasynda geçirilen gözden geçirilişde saýlanan ýaş zehinli aýdymçylar çykyş etdiler.
Eminler toparynyň gelen netijelerine görä etrabyň Çowdyr geňeşligindäki Tommakýap oba medeniýet öýüniň çeper höwesjeňi Amanow Baýgeldi, etrabyň Gubadag şäher medeniýet çeper höwesjeňi Atabaýewa Aýperi, etrabyň Gökýaýla geňeşligindäki Ak-altyn oba medeniýet öýüniň çeper höwesjeňi Berdimyradow Döwlet, etrabyň Almalyk geňeşligindäki Bereketli oba medeniýet öýüniň çeper höwesjeňi Çowdyrow Ýagşymyrat, etrabyň Gubadag şäher medeniýet merkeziniň çeper höwesjeňi Durdyýewa Aýşat, etrabyň Gubadag geňeşligindäki Beglerýap oba medeniýet öýüniň çeper höwesjeňi Ilamanow Kakageldi, etrabyň Rowaçlyk geňeşligindäki Galdow oba medeniýet öýüniň çeper höwesjeňi Gurbangeldiýew Kemal dagylar üstünlikli çykyş edip, welaýat derejesinde geçiriljek seçip alyş tapgyryna gatnaşmana hukuk gazandylar. Bäsleşige gatnaşyjylara etrap medeniýet bölüminiň hem-de TMÝG-niň Boldumsaz etrap Geňeşiniň ýadygärlik sowgatlary, hormat hatlary dabaraly ýagdaýda gowşuryldy.
Dabaranyň ahyrynda oňa gatnaşyjylar Berkarar döwletiň täze eýýamynyň Galkynyşy döwründe milli medeniýetimiziň, aýdym-saz sungatymyzyň ösmegi, medeni mirasymyzyň, däp-dessurlarymyzyň gaýtadan dikeldilmegi üçin aladalar edýän Gahryman Arkadagymyzyň janynyň sag, ömrüniň uzak, döwletli işleriniň rowaç bolmagyny arzuw etdiler.
Çary KAKABAÝEW,
Türkmenistanyň Magtymguly adyndaky
Ýaşlar guramasynyň Daşoguz welaýatynyň
Boldumsaz etrap Geňeşiniň başlygy.
