Türkmenistanyň wekili Serbiýanyň ajaýyp Wrnýaçka-Banýa şäherinde görmek ukyby çäkli küştçüleriň arasynda geçirilen XVII Bütindünýä küşt Olimpiadasynda ilkinji gezek medal gazandy. Onda türkmenistanly FIDE ussatlygyna dalaşgär Aýdogdy Atabaýew bürünç medala mynasyp boldy.
Görmek ukyby çäkli küştçüleriň Halkara guramasy (IBCA) tarapyndan her dört ýylda bir gezek geçirilýän bu ýaryşa Ýewropadan, Aziýadan we Günorta Amerikadan 22 milli ýygyndy topar gatnaşdy.
Ýaryş FIDE küşt olimpiadalarynyň resmi düzgünlerine laýyklykda, Şweýsar ulgamy boýunça 9 tapgyrda geçirildi. Bu bolsa onuň hünäri derejesini nygtaýar. Onda oýnuň başyndan her oýunça her göçümi üçin 30 sekunt artdyrmak bilen, 120 minut wagt berilýär.
Aýdogdy Atabaýew bürünç medala birinji tagtada mynasyp boldy, ol bu ýerde 5 oýunda ýeňiş gazanyp, 2 oýny deňme-deň oýnap, mümkin bolan 7 utukdan 6 utuk toplady. Şu ýagdaýda iň soňky ýer ýaryşyň görkezijisi (performans) boýunça kesgitlenýär bu görkezijisi garşydaşlaryň görkezijisini-de göz öňünde tutmak bilen, oýnuň hilini görkezýär. Chess-Results (küşt netijeleri) saýtyndaky resmi görkezijisine laýyklykda, 2353 görkezijisi bolan A.Atabaýew diňe iki grossmeýsterden – polşaly Martsin Tazbirden (görkezijisi 2543) we ispaniýaly Daniel Pulwetden (görkezijisi 2467) asgyn geldi, ýöne Ukrainadan, Germaniýadan, Fransiýadan, Rumyniýadan we beýleki ýurtlardan gelen birnäçe derejeli oýunçydan üstün çykdy.
«IBCA-nyň XVII Bütindünýä küşt Olimpiadasy dünýäniň çar künjeginden gelen görmek ukyby çäkli küştçüleriň akyla sygmajak zehinini we sport ussatlygyny ýene bir gezek görkezdi» diýip, IBCA-nyň başlygy Ýorgen Magnusson belledi.
1958-nji ýylda döredilen görmek ukyby çäkli küştçüleriň Halkara guramasy (IBCA) Halkara küşt federasiýasynyň (FIDE) we Halkara görmek ukyby çäkli küştçüleriň sport federasiýasynyň (IBSA) agzasydyr. Görmek ukyby çäkli küştçüleriň Halkara guramasy tutuş dünýädäki agzalary üçin küşt ýaryşlaryny we çärelerini wagyz edýär, düzgünleşdirýär we guraýar, munuň üçin ol görüşi pes bolan küşt oýunçylarynyň ähli mümkinçiliklerini ýüze çykaryp we sportuň bu görnüşiniň uly artykmaçlygyny duýup biljek özboluşly bir gurşaw döredýär.
turkmenistan.gov.tm
