Berkarar döwletiň täze eýýamynyň Galkynyşy döwründe ýurdumyzda ýaşlaryň döredijilik başarnyklaryny ýüze çykarmak we ösdürmek maksady bilen geçirilýän çäreler uly ähmiýete eýedir. Şolaryň biri hem Türkmenistanyň Magtymguly adyndaky Ýaşlar guramasynyň Merkezi Geňeşiniň ýanyndaky Maglumat, maslahat beriş we meýletinçilik hereketiniň işleri boýunça Merkeziniň guramagynda guralan «Ýaş şahyrlar we žurnalistler» atly gurnagyň nobatdaky döredijilik duşuşygydyr. Bu duşuşyk TMÝG-niň Merkezi Geňeşiniň mejlisler zalynda geçirilip, ol ýaşlaryň döredijilik mümkinçiliklerini ösdürmekde möhüm ähmiýete eýe boldy.
Duşuşyga dürli ýokary okuw mekdeplerinden gelen döredijilige höwesli talyp ýaşlar, ýaş žurnalistler hem-de metbugat işgärleri gatnaşdylar. Olar Watana, ene topraga, bagtyýar ýaşlyga, parahatçylyga bagyşlap ýazan şygyrdyr we proza eserlerini okamak bilen, diňleýjilerde uly gyzyklanma döretdiler. Bu duşuşyk gatnaşyjylaryň döredijilik dünýäsini baýlaşdyrmak bilen birlikde, olara täze eserleri ýazmaga ruhlandyrdy.
Şahyrlar Aşyrmät Garlyýew we Gurbanjemal Annakowa gurnagyň bu gezekki duşuşygynyň hormatly myhmanlary boldular. Halypa döredijilik işgärleri ýaşlaryň çykyşlaryny uly üns bilen diňläp, olaryň döredijilik äheňleri barada täsirli maslahatlary berdiler. Şahyr Aşyrmät Garlyýew ýaşlaryň döredijilige bolan höwesiniň ýylsaýyn artýandygyny belläp, şeýle döredijilik duşuşyklarynyň ýaş şahsyýetleriň kemala gelmeginde örän möhüm ähmiýetiniň bardygyny nygtady. Şeýle-de halypa şahyr öz döredijilik eserlerinden birnäçesini okap, ýaşlaryň ruhlaryny galkyndyrdy. Gurbanjemal Annakowa hem çykyşynda ýaşlara döredijilikde sabyrlylygyň, pikir çuňlugynyň we yzygiderliligiň möhüm orny eýeleýändigini belläp geçdi.
Duşuşykda redaktirleme, ýazuw usullary, metbugat bilen işleşmek ýaly döredijilik işleriniň tehniki we usuly taraplary barada hem tejribe alyşmalar geçirildi. Şeýle gatnaşyklary ýaşlaryň şahsyýet derejesinde ösüşine, olaryň döredijilik mümkinçilikleriniň ýüze çykmagyna uly ýol açýar.
TMÝG-niň Merkezi Geňeşiniň ýanyndaky Maglumat, maslahat beriş we meýletinçilik hereketiniň işleri boýunça Merkeziň bu görnüşli döredijilik duşuşyklaryny yzygiderli geçirmegi ýaş zehinleriň ösdürilmegine uly itergi berýär. Şeýle çäreleriň dowamly bolmagy döredijilikli pikirleriň, watansöýüjilik, halallyk, ruhubelentlik ýaly gymmatlyklaryň ýaş nesliň kalbynda berk ornaşmagyna uly mümkinçilik döredýär. Bu gurnagyň duşuşyklary her hepdäniň sişenbe güni geçirilip, döredijilige höwes bildirýän ähli ýaşlary gatnaşmaga çagyrýar.
«Ýaş şahyrlar we žurnalistler» gurnagynyň duşuşyklary diňe bir ýaşlary döredijilige höweslendirmek bilen çäklenmän, eýsem olaryň döredijilik ukyplaryny ösdürmäge, täze pikirleri ýüze çykarmaga, ýaş nesliň ruhy dünýäsi bilen jemgyýetiň arasyndaky baglanyşygy pugtalandyrmaga hyzmat edýär. Bu bolsa ýurdumyzda ýaşlar baradaky döwlet syýasatynyň üstünlikli durmuşa geçirilýändigini ýene bir ýola subut edýär.
Eziz Watanymyzyň bagtyýar geljegini gurýan, ýaş nesliň ruhubelentlige we döredijilik ösüşine giň ýol açýan, türkmen halkynyň Milli Lideri Gahryman Arkadagymyzyň hem-de hormatly Prezidentimiz Arkadagly Gahryman Serdarymyzyň janlary sag, ömürleri uzak bolsun, il-ýurt bähbitli, beýik başlangyçlary elmydama rowaçlyklara beslensin!
Annageldi GODOROW,
Türkmenistanyň Magtymguly adyndaky Ýaşlar guramasynyň
Merkezi Geňeşiniň ýanyndaky Maglumat, maslahat beriş we
meýletinçilik hereketiniň işleri boýunçaMerkeziniň başlygy.
