Türkmenistanyň Magtymguly adyndaky Ýaşlar guramasynyň Balkan welaýatynyň Türkmenbaşy şäher Geňeşiniň guramagynda «Arzuw» çagalar sagaldyş we dynç alyş merkezinde Gurbanguly Berdimuhamedow adyndaky Howandarlyga mätäç çagalara hemaýat bermek boýunça haýyr-sahawat gaznasynyň hasabyna bejergi alan çagalaryň hem-de Birleşen Arap Emirlikleriniň Prezidenti Şeýh Zaid bin Sultan Al Nahaýýan adyndaky Döwletliler köşgünde terbiýelenýän çagalaryň arasynda kiçi futbol boýunça bäsleşik geçirildi.
Çagalar öz aralarynda Laçyn, Bürgüt, Peýkam, Balkan ýaly toparlara bölünip toparlaýyn bäsleşdiler, özleriniň ukyp-başarnyklaryny açyp görkezdiler we wagtlaryny şadyýan geçirdiler. Bäsleşigiň dowamynda ýeňiji bolan çagalara Türkmenistanyň Magtymguly adyndaky Ýaşlar guramasynyň Balkan welaýatynyň Türkmenbaşy şäher Geňeşi tarapyndan ýadygärlik sowgatlar berildi.
Bäsleşigiň ahyrynda çagalar şeýle ajaýyp döwürde okamaga, öwrenmäge, dynç almaga giň mümkinçilikleri döredip berýän Gahryman Arkadagymyza we Arkadagly Gahryman Serdarymyza çaga kalplaryndan sag bolsun aýtdylar.
Umyt BAÝHANOW,
Türkmenistanyň Magtymguly adyndaky
Ýaşlar guramasynyň Balkan welaýatynyň
Türkmenbaşy şäher Geňeşiniň başlygy.
