Golaýda Türkmenistanyň Magtymguly adyndaky Ýaşlar guramasynyň Balkan welaýatynyň Türkmenbaşy şäher Geňeşiniň we Türkmenbaşy şäher Bilim bölüminiň bilelikde guramagynda çagalar we ýetginjekler öýünde «Halkara parahatçylyk we ynanyşmak» ýylynda hemişelik Bitaraplygymyzyň ýubileý 30 ýyllygy mynasybetli ýurdumyzyň umumybilim berýän mekdepleriniň arasynda «Parahatçylyk: çagalaryň sesi» atly döredijilik bäsleşigi geçirildi.
Bäsleşigiň dowamynda mekdep okuwçylary düzgünnamanyň 3 şerti boýunça, ýagny, 1-nji şertinde okuwçylaryň hödürlän işlerinde hormatly Prezidentimiziň baştutanlygynda ýurdumyzyň ösüşi, parahatsöýüjilik ýörelgeleri, ýetilen sepgitler, hemişelik Bitaraplygymyzyň gazananlary dogrusynda maket; 2-nji şertinde ýaşlaryň bagtyýar durmuşy, Berkarar döwletiň täze eýýamynyň Galkynyşy döwrüniň çeper keşbi; 3-nji şertinde bolsa «Dünýä dursun parahat» diýen temada ýazylan düzme boýunça bäsleşdiler.
Bäsleşik şowhunly, şadyýan, gyzykly geçdi. Bäsleşik jemi boýunça ýeňijilere Türkmenistanyň Magtymguly adyndaky Ýaşlar guramasynyň Balkan welaýatynyň Türkmenbaşy şäher Geňeşi tarapyndan ýadygärlik sowgatlary gowşuryldy.
Bäsleşigiň ahyrynda oňa gatnaşanlar ýurdumyzy bagtly çagalygyň mekanyna öwürýän, ýaş nesilleriň zehinlerini ýüze çykarmakda döredip berýän ähli mümkinçilikleri üçin Gahryman Arkadagymyza we hormatly Prezidentimize çäksiz hoşallyk sözlerini aýtdylar.
Umyt BAÝHANOW,
Türkmenistanyň Magtymguly adyndaky Ýaşlar guramasynyň
Balkan welaýatynyň Türkmenbaşy şäher Geňeşiniň başlygy.
