Türkmenistanyň Inžener-tehniki we ulag kommunikasiýalary institutynda Halkara parahatçylyk we ynanyşmak ýyly, Türkmenistanyň hemişelik Bitaraplygynyň 30 ýyllygy we Bütindünýä durnukly ulag güni mynasybetli sanly ulgam arkaly «Halkara ulag-logistiki hyzmatdaşlygy berkitmekde Türkmenistanyň durnukly ulag syýasatynyň orny» atly halkara ylmy-amaly maslahat geçirildi.
Maslahata ýurdumyzyň we daşary ýurtlaryň pudaklaýyn kärhanalarynyň we kompanýalarynyň, bilim we ylym edaralarynyň, şeýle hem BMGÖM-niň Türkmenistandaky wekilhanasynyň wekilleri gatnaşdylar. Maslahat Hytaýyň, Russiýanyň, Belarusyň, Täjigistanyň, Özbegistanyň, Gyrgyzystanyň, Owganystanyň, Germaniýanyň, Türkiýäniň we Niderlandlaryň wekillerini bir ýere jemledi.
Umumy mejlisdäki çykyşlarda ulag hyzmatdaşlygynyň halkara-hukuk esasyny emele getirýän wezipelere garaldy.
Soňra maslahat «Türkmenistanyň Bitaraplyk syýasaty we ulag diplomatiýasy», «Türkmenistanyň ulag ulgamynyň ösüşiniň ylmy esaslary« hem-de «Türkmenistanyň ulag pudaklarynda ylym-bilim-önümçilik arabaglanyşygy» diýen bölümçe mejlisleriniň işleri bilen dowam etdi.
Çykyş edenler Türkmenistanyň durmuş-ykdysady ösüşinde ulag pudagynyň eýeleýän orny, halkara hyzmatdaşlygyny işjeňleşdirmekde, awtomobil, demir ýol, howa, deňiz we derýa ulaglary pudaklarynda durmuşa geçirilýän milli we halkara taslamalarynda ýurduň ulag diplomatiýasy, şeýle hem bu ulgamda ulag strategiýasyny üstünlikli amala aşyrmakda hem-de halkara hyzmatdaşlygy pugtalandyrmakda Türkmenistanyň Bitaraplygynyň we «Açyk gapylar» syýasatynyň ähmiýeti barada giňişleýin gürrüň berdiler.
Bellenilişi ýaly, geoykdysady taýdan amatly ýerleşen Türkmenistan ýurduň ulag-üstaşyr kuwwatyny peýdalanmaga aýratyn ähmiýet berilýär. Döwlet dünýäniň ýurtlarynyň sazlaşykly ösüşine ýardam edýän durnukly ulag-üstaşyr infrastrukturasynyň kemala getirilmegine gönükdirilen uly tagallalar edýär. Gündogar – Günbatar we Demirgazyk – Günorta ugurlar boýunça täze ulag-üstaşyr geçelgeleri döretmek babatda uly işler geçirilýär. Bu bolsa Ýewraziýa giňişliginde özara bähbitli sebit we halkara söwda-ykdysady gatnaşyklaryny işjeňleşdirmek üçin giň mümkinçilikleri açýar.
Türkmenistan logistikany ösdürmäge we diwersifikasiýalaşdyrmaga uly üns berýär. Ulag-kommunikasiýa strategiýasyny durmuşa geçirip, ýurt sebit we yklym ähmiýetli möhüm ulag-logistika merkezi hökmünde eýeleýän ornuny berkidýär.
Türkmenistanyň sebitde durnukly ösüşi we howpsuzlygy üpjün etmek ugrunda tagallalaryny yzygiderli artdyrýandygy hem-de anyk çäreleri görýändigi nygtaldy. Ýurdumyz Birleşen Milletler Guramasy bilen strategik hyzmatdaşlygy pugtalandyrmaga uly ähmiýet berýär. Türkmenistan möhüm halkara başlangyçlar bilen çykyş edýär, olary Birleşen Milletler Guramasy tarapyndan kabul edilen Kararnamalaryň çäklerinde durmuşa geçirmek boýunça yzygiderli we netijeli işleri alyp barýar.
Munuň ýakyndaky mysallarynyň biri hökmünde şu ýylyň awgust aýynda «Awaza» milli syýahatçylyk zolagynda geçirilen BMG-niň Deňze çykalgasy bolmadyk ösüp barýan ýurtlar boýunça üçünji maslahatyny görkezip bolar. Bu iri halkara waka deňze çykalgasy bolmadyk ösüp barýan ýurtlaryň meselelerine dünýä jemgyýetçiliginiň ünsüni çekdi hem-de ählumumy durnukly ösüşi gazanmakda ýol-ulag infrastrukturasynyň uly orun eýeleýändigini nobatdaky gezek ýüze çykardy.
Häzirki wagtda Türkmenistanyň başlangyjy bilen durnukly ulag ulgamynda BMG-niň Baş Assambleýasynyň alty sany Kararnamalary kabul edildi. Şolaryň biri 26-njy noýabry «Bütindünýä durnukly ulag güni» diýip yglan etmek hakyndaky Kararnamadyr. Ol durmuş-ykdysady ösüş üçin howpsuz, elýeterli we durnukly ulag ulgamlarynyň wajypdygy barada habarly bolmagy ýokarlandyrmaga gönükdirlendir. Bu sene 2016-njy ýylyň 26-njy noýabrynda Aşgabatda Durnukly ulag boýunça ilkinji ählumumy maslahatynyň geçirilmegi mynasybetli ýola goýuldy.
Türkmenistanyň halkara parahatçylygy we ynanyşmagy, halklaryň we döwletleriň arasynda dostlukly we hoşniýetli gatnaşyklary ösdürmegi işjeň öňe ilerledýändigi aýratyn nygtaldy.
Maslahatda Owganystanyň wekilleriniň – Türkmenistanyň Inžener-tehniki we ulag kommunikasiýalary institutynyň uçurymlarynyň çykyşlary munuň nobatdaky subutnamasy boldy. Uçurymlar bu ýokary okuw mekdebi dürli ýyllarda tamamlap, häzirki wagtda öz Watanynyň demir ýol ulaglary pudagynda üstünlikli zähmet çekýärler. Owganystanyň wekilleri doganlyk Türkmenistanda ýokary hilli bilim almaga we hünär taýýarlygyna eýe bolmaga giň mümkinçilikleriň döredilendigi üçin Gahryman Arkadagymyza we Arkadagly Gahryman Serdarymyza tüýs ýürekden hoşallyk bildirdiler.
Maslahata gatnaşyjylara ýurdumyzyň ulag ulgamynda, şeýle hem ylmy-barlag, okuw-usulyýet bilim işlerinde Türkmenistanyň Inžener-tehniki we ulag kommunikasiýalary institutynyň gazanan üstünliklerine bagyşlanan sergi görkezildi.
turkmenistan.gov.tm
