Röwşen aýdar, ýa Jepbar,
Şahymerdan, bol medetkär!
Jylawynda iki pir bar,
Ölinçä ýoldaşdyr Gyrat.
***
Bedew atyň tarypyny aýdaly,
Her hünäri üç ýaşynda bellidir.
Bozduman aýakly, bazbent toýnakly,
Gözi dag başynda, burny ýellidir.
***
Gurbanyň bolaýyn, janym Gyratym,
Azal derýasyndan geçer günüňdir.
Dünýäde zynatym, güýjüm-kuwwatym,
Algyr laçyn kimin uçar günüňdir.
***
Bedewi saklamak, bil, zeruratdyr,
Ýigidiň ýoldaşy bir ýüwrük atdyr,
Bu dünýäde atsyz ýigit arbatdyr,
Zynhar sen Gyraty goýma höwüre!
***
Owsun urup, tor gezer sen,
Jeren gaçsa, tiz alar sen.
Gelin-gyz dek sallanar sen,
Berekella, Gyrat, saňa!
***
Näge akar gözüň ýaşy,
Batyr ýigidiň syrdaşy,
Göroglynyň baş ýoldaşy,
Neçün gara baglanar sen?
***
Atym düldüliň zürýady,
Söweş güni göwnüm şady,
Maňa köpdür ygtykady,
Atym atma, meni öldür.
***
Üstüňe salardym zer sap,
Müner erdim sagryň darap,
Juluň mahmal, torbaň zerbap,
Edenlerim halal bolsun.
***
Ýigidiň bolsa döwleti,
Goşlap gezse bedew aty,
Il içinde bor şöhraty,
Hem sowady-haty gerek.
***
Ýigidiň myrady atdyr,
Atsyz ýigitler arwatdyr,
Saklamak täji-döwletdir,
At ýigidiň goldaşydyr.
***
Aýaklaryň galdyr, nalyň kakaýyn,
Dyzyňdan aşagňa hyna ýakaýyn,
Agşam iýmiň berip, ertir bakaýyn,
Gyrat, meni Çandybile sen ýetir!
