Abbasguly Maragaýynyň “Emsaly — türkana” (“Türki atalar sözi”) atly ýygyndysyndan
***
Sakgal gabasy neýlesin, başda akyl bolmasa.
***
Salamatlyk dil saklamakdadyr.
***
Sapa saplykdadyr.
***
Salawat (dogumlylyk) güýje degişlidir.
***
Sapar peýdasy saglykdyr.
***
Selin-ýowşan ok saklamaz.
***
Sen gamy iýýänçäň, gam seni iýer.
***
Senet gyzyldyr.
***
Sepil basylar, zalym asylar.
***
Serçe bilbil sedasyny bermez.
***
Söz ýalňyşy bolar, ýalany bolmaz.
***
Serdarsyz leşger basylagan bolar.
***
Serinden geçmedik, serdar bolmaz.
***
Säherçillik döwletlilikden nyşandyr.
***
Sogan iýmän, nämä ajaýaň?!
***
Soňky puşeýmanlyk peýda bermez.
***
Sowuk bilen oýun bolmaz.
***
Söýen söýeni tapar.
***
Söhbet ýarsyz haramdyr.
***
Söhbeti bagyýa (özüne) salan är däldir.
***
Sökülen sebet peýda bermez.
***
Söz bar — halk içinde, söz bar — hulk içinde.
***
Söz bilen palaw bolmaz, ýag bilen tüwi bolmasa.
***
Söz kümüşden bolsa, diýmezlik gyzyldandyr.
***
Söz wagtyna çeker.
***
Söz ulynyňky, suw kiçiniňki.
