TÜRKMENISTANYŇ ÝAŞLARYNYŇ ARASYNDA YLMY
IŞLER BOÝUNÇA BÄSLEŞIK GEÇIRMEK HAKYNDA
DÜZGÜNNAMA
Garaşsyz, hemişelik Bitarap Türkmenistan döwletimizde hormatly Prezidentimiziň öňdengörüjilikli we parasatly baştutanlygynda ylmyň we tehnologiýalaryň ösüşine, halkymyzyň aň-bilim derejesiniň ýokarlandyrylmagyna, ylmyň, tehnikanyň we önümçiligiň bitewiliginiň üpjün edilmegine aýratyn ähmiýet berilýär. Türkmenistanyň ykdysady we durmuş ösüşi babatda dünýäniň iň ösen döwletlerine mahsus bolan sepgitlere çykmagyna gönükdirilen giň gerimli maksatnamalar we meýilnamalar düýpli ylmy esaslara daýanýar. Nebit-gaz, oba-hojalyk, gurluşyk, energetika, dokma, ykdysadyýet, maliýe, bank toplumlaryna, söwda, ulag, aragatnaşyk, himiýa, balyk hojalygy, medeniýet, ylym, bilim, saglygy goraýyş, sport, syýahatçylyk ulgamlaryna ylmyň we tehnologiýalaryň gazananlary ornaşdyrylýar.
Türkmenistanyň Ylymlar akademiýasy we Türkmenistanyň Magtymguly adyndaky Ýaşlar guramasynyň Merkezi Geňeşi Türkmenistanyň Prezidentiniň 2015-nji ýylyň 6-njy fewralynda çykaran “Türkmenistanyň ýaşlarynyň arasynda ylmy işler boýunça bäsleşik geçirmek hakyndaky” 14109-njy Kararyna laýyklykda ýurdumyzyň ýaşlarynyň ylymly, bilimli, Watana, halka wepaly, giň gözýetimli, maksada okgunly, zähmetsöýer we öňdebaryjy nesiller bolup ýetişmeklerini, ýaş alymlaryň täze ylmy we inženerçilik pikirlerini, senagat-innowasiýa we maglumat-tehnologiki işläp taýýarlamalarynyň milli ykdysadyýetimize giňden ornaşdyrylmagyny üpjün etmek, ylymda halypa-şägirtlik ýörelgelerini rowaçlandyrmak, innowasiýa tehnologiýalaryndan oňat baş çykarýan, başarjaň hünärmenleri taýýarlamakda ýokary netijeleri gazanmak maksady bilen şeýle-de Türkmenistanyň Prezidentiniň 2015-nji ýylyň 13-nji noýabrynda çykaran 14488-nji Karary bilen tassyklanylan Türkmenistanda ylmyň we tehnologiýalaryň ileri tutulýan ugurlaryna laýyklykda ýaşlaryň arasynda ylmy işler boýunça bäsleşigi yglan edýär.
I. Umumy düzgünler
1. Bäsleşige hödürlenilýän ylmy işler aşakdaky ugurlara laýyklykda kabul edilýär:
- nanotehnologiýalar, himiki tehnologiýalar, täze materiallary öwrenmek we energetika;
- biotehnologiýa, molekulýar biologiýa, oba hojalygy, ekologiýa we genetika boýunça;
- maglumat we aragatnaşyk ulgamlary, kompýuter tehnologiýalary;
- häzirki zaman lukmançylyk we derman serişdelerini öndürmek tehnologiýalary;
- innowasiýa ykdysadyýeti;
- ynsanperwer ylymlary;
2. Bäsleşige resminama kabul edilen gününe çenli ýaşy 30-a çenli bolan ýaşlaryň özbaşdak ýerine ýetiren ylmy işleri kabul edilýär.
II. Ylmy işleri bäsleşige hödürlemegiň we resmileşdirmegiň tertibi
3. Bäsleşige Türkmenistanyň Magtymguly adyndaky Ýaşlar guramasynyň agzasy bolan gatnaşyjylaryň ylmy işlerini hödürlemäge şu aşakdakylara hukuk berilýär:
- Türkmenistanyň Ylymlar akademiýasynyň we pudaklaýyn ylmy-barlag institutlaryna, Tehnologiýalar merkezine, ýokary okuw mekdeplerine;
- ylmy-tehniki we tehniki kärhanalaryň hem-de guramalaryň geňeşlerine;
- orta we orta hünär okuw mekdepleriň okuw-usulyýet birleşiklerine;
- ministrliklerde we pudaklaýyn-dolandyryş edaralarynda, eýeçiliginiň görnüşine we guramaçylyk-hukuk görnüşine garamazdan, assosiasiýalarda, kärhanalarda, birleşiklerde, paýdarlar jemgyýetlerinde işleýän we ylmy iş bilen meşgullanýan, aspiranturada, ardinaturada, doktoranturada okaýan ýa-da dalaşgär bolup durýan, şeýle-de wagtlaýyn işlemeýän ýaşlara.
Talyplaryň tehnologik, inženerçilik, ykdysady, durmuş, gumanitar we beýleki meselelere bagyşlanan ylmy işlerini bäsleşige hödürlemäge Türkmenistanyň ýokary okuw mekdepleriniň rektorlygyna hukuk berilýär hem-de soňky 3 (üç) ýylyň dowamynda ýokarda görkezilen degişli ugurlaryň biri boýunça ýerine ýetiren, ylmy wezipeleri goýmagyň we çözmegiň aýratynlygy bilen tapawutlanýan ylmy işler kabul edilýär.
Okuwçylaryň ylmy işlerini bäsleşige hödürlemäge Aşgabat şäheriniň, welaýatlaryň we etraplaryň bilim müdirliklerine hem-de ýerlerdäki welaýat, şäher, etrap ýaşlar guramalaryna hukuk berilýär.
III. Bäsleşige hödürlenýän resminamalaryň sanawy:
4. Bäsleşige hödürlenýän ylmy işleriň resminamalarynyň sanawyna şulary goşmak hökmandyr:
4.1. Ylmy işi hödürleýän edaranyň ýolbaşçysynyň ugrukdyryjy haty (onda ylmy işiň bäsleşigiň ylmyň we tehnologiýalaryň ileri tutulýan ugurlarynyň haýsysyna degişlidigi, işiň doly ady, ylmy işi ýerine ýetireniň familiýasy, ady we atasynyň ady görkezilmeli);
4.2. Alymlar tarapyndan berlen oňyn synlar (azyndan 2 (iki) sany bolup, olaryň birisi başga ylmy edaradan);
4.3. Degişli edaranyň alymlar geňeşiniň ylmy işi bäsleşige hödürlemek baradaky geçiren maslahatynyň beýany hem-de amaly gymmatyny tassyklaýan resminamalar (ylmy makalalar, oýlap tapyşlar we senagat nusgalary, patent we ş.m.);
4.4. Bäsleşige gatnaşyjynyň ýerine ýetiren ylmy işi barada ylmy žurnallarda neşir edilen esasy ylmy makalalarynyň sanawy (doly maglumat bilen);
4.5. Gatnaşan ylmy, amaly maslahatlarynyň sanawy (doly maglumat bilen);
4.6. Bäsleşige gatnaşyjylar hakynda maglumatlar 2 nusgada çykarylan hem-de elektron görnüşinde (familiýasy, ady, atasynyň ady, doglan güni, aýy, ýyly, wezipesi, ylmy derejesi, gulluk we öý salgysy hem-de telefon belgisi);
4.7. Pasportynyň nusgasy, 16 ýaşy dolmadyk bolsa, dogluş hakynda şahadatnamasynyň nusgasy;
4.8.Türkmenistanyň Magtymguly adyndaky Ýaşlar guramasynyň agzalyk şahadatnamasy;
4.9.Işlemeýän bolsa, ugrukdyryjy haty zerur däl.
5. Bäsleşige hödürlenýän ylmy işi ýokarda görkezilen resminamalar bilen bilelikde “Ýaş alymlaryň arasyndaky ylmy işler boýunça bäsleşigine” diýen ýazgy bilen bukja salyp, Türkmenistanyň Magtymguly adyndaky Ýaşlar guramasynyň Merkezi Geňeşine ibermeli.
6. Ylmy işler bäsleşige türkmen dilinde kitap, makala, ylmy işi ýazmagyň kadalaryna (14 şriftde, 1,5 setirarasy, ýokardan we aşakdan 2 sm, çepden 3 sm, sagdan 1,5 sm goýlan, Times New Roman, çykgytly we ş.m. talaplary özünde jemleýän) gabat gelýän ýazgy görnüşinde hödürlenýär. Ylmy işde döwlet nyşanlarynyň, bezegleriň we bibliografiýa ýazgylarynyň (peýdalanylan edebiýatlar) bolmagy hökmandyr.
Bäsleşige hödürlenýän işiň ýüzünde ýerine ýetirijiniň we hödürleýän guramanyň ady görkezilmeýär.
IV. Işleri seljermegiň we bäsleşigiň netijelerini jemlemegiň tertibi
8. Ylmy işler bildiriş we Düzgünnama metbugatda çap edilen gününden kabul edilip başlanýar.
9. Bäsleşik üç tapgyrda geçirilýär hem-de 12-nji iýunda – Ylymlar gününde jemlenýär.
10. Türkmenistanyň Ylymlar akademiýasy we Türkmenistanyň Magtymguly adyndaky Ýaşlar guramasynyň Merkezi Geňeşi ýaşlaryň arasynda ylmy işler boýunça bäsleşigine gelen ylmy işleri seljermek üçin ylmyň we tehnikanyň degişli ugurlary boýunça alymlaryň we hünärmenleriň gatnaşmagynda seljeriş toparyny döredýär.
11. Ylmy işi özbaşdak ýerine ýetiren awtorlary degişli edaranyň alymlar geňeşi tarapyndan mejlisiň birinji ýygnagyna çagyrylýar, ol ýerde ýaş alym şu aşakdaky tertip boýunça işini tanyşdyrýar: temanyň derwaýyslygyny, işiň maksadyny, ylmy täzeligini, ylmy-barlagyň materiallaryny we usulyýetini, netijelerini amaly hödürnamalaryny, ylmy netijeleriň makullanylyşyny, tassyklanylyşyny (aprobasiýasyny).
12. Alymlar geňeşi bäsleşige gatnaşýan ýaşlaryň ylmy çykyşlaryny mejlislerde diňläp, düýpli seljerip, 10-a çenli ylmy işleri Türkmenistanyň Ylymlar akademiýasynyň hem-de Türkmenistanyň Magtymguly adyndaky Ýaşlar guramasynyň Merkezi Geňeşiniň bilelikdäki mejlisiniň garamagyna hödürleýär.
13. Seljeriş toparynyň agzalary bäsleşigiň indiki mejlisinde alymlar geňeşi tarapyndan ylmy işleri has düýpli seljermek maksady bilen ýaşlary öz işini goramaga çagyrýar. Iş goralan wagtynda bäsleşige gatnaşyjy işiň mazmunyny doly açyp görkezmelidir. Seljeriş topary işiň mazmunyna, amaly taýdan peýdalanmak mümkinçiligine baha berýär.
14. Ylmy işiň indiki mejlisinde awtorlar Türkmenistanyň Ylymlar akademiýasynyň we Türkmenistanyň Magtymguly adyndaky Ýaşlar guramasynyň Merkezi Geňeşiniň seljeriş toparynyň bilelikdäki ýygnagynda işini goraýarlar. Bu mejlisde Türkmenistanyň Ylymlar akademiýasynyň, Türkmenistanyň Magtymguly adyndaky Ýaşlar guramasynyň Merkezi Geňeşiniň ýolbaşçy düzümleriniň, Türkmenistanyň Ylymlar akademiýasynyň, Ýaşlar guramasynyň seljeriş toparynyň başlyklary hökmany ýagdaýda gatnaşmagy üpjün edilýär.
Seljeriş toparynda karar açyk ses bermek we sesleriň ýönekeý köplügi bilen kabul edilýär. Seljeriş topary işlere seretmegiň netijelerini (işiň wajyplygy, baýrakly orna hödürlenmäge mynasypdygy ýa-da kemçilikler esasynda baýrakly orna hödürlenmäge mynasyp bolmandygy baradaky bellikleri, subutnamalary) ähli agzalarynyň tassyklaýan beýany bilen resmileşdirýär we her bir ýeňiji bolan ylmy işe syn berýär.
15. Bilelikdäki iş topary bäsleşigiň ýeňijilerini tassyklamak üçin Türkmenistanyň Prezidentine hödürleýär. Bäsleşigiň ýeňijileri Türkmenistanyň Prezidentiniň Karary bilen tassyklanýar.
16. Ýaşlaryň arasyndaky ylmy işleriň bäsleşiginiň netijeleri köpçülikleýin habar beriş serişdeleriniň üsti bilen halk köpçüligine ýetirilýär.
17. Ýaşlaryň arasyndaky ylmy işleriň bäsleşiginiň ýeňijileri Türkmenistanyň Prezidentiniň Ýaş alymlary goldamak boýunça gaznasynyň serişdeleriniň hasabyna gymmat bahaly sowgatlar bilen sylaglanýar.
18. Bäsleşige gatnaşýan ýaşlar ylmy işlerini ýerine ýetirmek üçin häzirki zaman barlaghana enjamlarynyň zerurlygy ýüze çykan ýagdaýynda Türkmenistanyň Ylymlar akademiýasynyň garamagyndaky Tehnologiýalar merkeziniň, ylmy-barlag institutlarynyň, ýokary okuw mekdepleriniň barlaghanalarynyň mümkinçiliklerinden peýdalanyp bilerler.
19. Türkmenistanyň ýaşlarynyň arasynda ylmy işler boýunça bäsleşige hödürlenýän ylmy işler 2019-njy ýylyň 15-nji fewralyna çenli sagat 09:00-dan 13:00-a we 14:00-dan 18:00-a aralygynda Aşgabat şäheriniň Garaşsyzlyk şaýolunyň 104-nji jaýynda, Türkmenistanyň Jemgyýetçilik guramalarynyň merkeziniň binasynda – Türkmenistanyň Magtymguly adyndaky Ýaşlar guramasynyň Merkezi Geňeşi tarapyndan kabul edilýär we ýaşlaryň ylmy işlerine baha berjek seljeriş toparyna iberilýär.
Sorag-jogap üçin telefon belgileri: 44-88-79, 44-88-80.
