17-nji oktýabrda hormatly Prezidentimiz Gyýanly şäherçesinde sebitde iri polimer zawodynyň — polietilen we polipropilen önümçiligi boýunça iri gazhimiýa toplumynyň açylyş dabarasyna gatnaşdy.
«Türkmenistanyň nebitgaz senagatyny ösdürmegiň 2030-njy ýyla çenli döwür üçin Maksatnamasynda» gurluşygy göz öňünde tutulan bu desga Garaşsyz, Bitarap Türkmenistanyň ösen senagat döwletine öwrülendiginiň aýdyň subutnamasy boldy.
Zawodyň ýokary tehnologiýalylygyny we daşky gurşawy goramagyň talaplaryny berjaý edýändigini ykrar etmegiň nyşany hökmünde täze kärhana Ýulius Kun adyndaky institutyň (Germaniýa), Sagdyn daşky gurşaw gaznasynyň (ABŞ) we Paul Şerrer ylmy-barlag institutynyň (Şweýsariýa) güwänamalary we degişli nyşanlary gowşuryldy.
Polimer zawodynyň açylan gününde dabara gatnaşyjylar täze kärhananyň golaýynda gök zolagyň düýbüni tutdular. Bu ýerde hormatly Prezidentimiz ilkinji agajy ekdi. Şol gün tebigaty goramagyň we dünýäde durnukly ösüşiň bähbidine umumy oňyn işe hakyky goşant hökmünde Türkmenistanyň ähli sebitlerinde köpçülikleýin bag ekiş çäresi geçirildi.
Hormatly Prezidentimiz täze senagat kärhanasynyň açylmagynyň öň ýanynda «LG International Сorporation» (Koreýa Respublikasy) kompaniýasynyň baş ýerine ýetiriji direktory Song Çi Hony kabul etdi. Myhman bilelikdäki iri taslamany — Gyýanlydaky polimer zawodynyň gurluşygyny amala aşyrmagy kompaniýa ynanylandygy üçin tüýs ýürekden hoşallyk bildirdi.
«Hyundai Engineering Сo., Ltd» (Koreýa Respublikasy) kompaniýasynyň prezidenti we baş ýerine ýetiriji direktory Sung Sang-Rok hormatly Prezidentimiz bilen bolan duşuşygyň barşynda Günorta Koreýanyň işewür toparlarynyň Türkmenistan bilen netijeli hyzmatdaşlygy ösdürmäge gyzyklanýandyklaryny belledi.
Şu ýerde gazhimiýa toplumynda hormatly Prezidentimiz «Çalyk Holding» kompaniýalar toparynyň dolandyryjylar geňeşiniň başlygy Ahmet Çalyk bilen duşuşyk geçirdi. Işewür milli Liderimizi Garabogaz şäherinde karbamid öndürýän zawody taslama kuwwatlylygyna çykarmak hem-de beýleki käbir bilelikdäki taslamalary, şol sanda Aşgabatda halkara bejeriş kosmetologiýa merkeziniň gurluşygyny ilerletmek boýunça işleriň barşy hakynda habar berdi.
Geçen hepdede hormatly Prezidentimiz we Özbegistan Respublikasynyň Prezidentiniň arasynda telefon arkaly gepleşigi boldy.
Taraplar özara gyzyklanma döredýän sebit we ählumumy derejeli möhüm meseleler barada pikir alyşdylar. Hormatly Prezidentimiz Gurbanguly Berdimuhamedow Özbegistan Respublikasynyň Prezidenti Şawkat Mirziýoýewi resmi sapar bilen Türkmenistana gelmäge çagyrdy. Çakylyk hoşallyk bilen kabul edildi. Saparyň möhletleri diplomatik ýollar arkaly ylalaşylar.
Hormatly Prezidentimiz Söwda-ykdysady hyzmatdaşlyk boýunça hökümetara türkmen-saud toparynyň altynjy mejlisiniň işine gatnaşmak üçin öz ýurdunyň wekiliýetine ýolbaşçylyk edip türkmen paýtagtyna gelen Saud Arabystany Patyşalygynyň söwda we maýa goýumlar ministri Majid Bin Abdulla Al Kasabini kabul etdi.
Milli Liderimiz Saud Arabystanynyň işewürlerini iki ýurduň milli ykdysadyýetleri üçin hem möhüm bolan ulgamlarda bilelikdäki taslamalary durmuşa geçirmegiň mümkinçiliklerine garamagy teklip etdi.
Şol gün Aşgabatda türkmen-saud hökümetara toparynyň altynjy mejlisinde söwda-ykdysady we maýa goýumlary, şol sanda azyk, derman senagaty, nebitgaz, himiýa, dokma, dag-magdan senagaty, şeýle hem raýat awiasiýasy, oba hojalygy, bilim we ylym, sport, medeniýet, syýahatçylyk ulgamlarynda, köpçülikleýin habar beriş serişdeleriniň ugry boýunça hyzmatdaşlyk meseleleriniň ara alyp maslahatlaşylandygyny bellemek gerek.
Geçen hepdäniň anna güni hormatly Prezidentimiziň geçiren Ministrler Kabinetiniň mejlisinde Prezident maksatnamalarynyň we ýurdumyzy durmuş-ykdysady taýdan ösdürmegiň beýleki maksatnamalarynyň durmuşa geçirilmeginiň barşyna garaldy.
Döwlet Baştutanymyza Türkmenistanyň deputatlarynyň wekiliýetiniň Parlamentara bileleşigiň 139-njy Assambleýasyna gatnaşmak üçin Şweýsariýa Konfederasiýasynyň Ženewa şäherine bolan iş saparynyň jemleri barada habar berildi.
Bellenilişi ýaly, Parlamentara bileleşigiň 139-njy Assambleýasyna gatnaşyjylar döwlet Baştutanymyzyň 2019-njy ýyly «Parahatçylyk we Abadançylyk ýyly» şygary bilen geçirmek baradaky BMG-niň Baş Assambleýasynyň 73-nji maslahatynyň münberinden öňe süren teklibini uly ruhubelentlik bilen kabul etdiler hem-de biragyzdan goldadylar.
Şeýle hem döwlet Baştutanymyzyň tabşyrygy boýunça Türkmenistanyň wekiliýetleriniň Özbegistan Respublikasyna we Azerbaýjan Respublikasyna iş saparlarynyň jemleri barada habar berildi.
Mejlisde 2018-nji ýylyň 28-nji oktýabry — 10-njy noýabry aralygynda türkmen paýtagtynda geçiriljek Agyr atletika boýunça dünýä çempionatyna taýýarlyk görmek meselelerine hem garaldy.
Milli Liderimiz saglygy goraýyş ulgamynda wezipeleri kesgitlemek bilen häzirki wagtda sebitlerde haýsy ugurly hassahanalaryň has zerurdygy baradaky meseläni öwrenmegi, şeýle hem degişli arassaçylyk we keselleriň öňüni alyş gulluklarynyň işiniň netijeliligini ýokarlandyrmak üçin göwnejaý çäreleri görmegi tabşyrdy.
Hormatly Prezidentimiz gurluşyk serişdeleri we himiýa pudagy ulgamyny mundan beýläk-de ösdürmegiň ileri tutulýan wezipelerini kesgitledi.
Milli Liderimiz milli ykdysadyýetimiziň pudaklarynyň ösdürilmegi üçin göz öňünde tutulýan karz serişdeleriniň möçberlerini ýokarlandyrmagy, şeýle hem kiçi telekeçiligi höweslendirmek we ösdürmek boýunça çäreleriň maliýeleşdirilmegini göz öňünde tutmagy tabşyrdy.
Hormatly Prezidentimiz mejlisiň çäklerinde Söwda-ykdysady we ylmy-tehniki hyzmatdaşlyk boýunça hökümetara türkmen-täjik toparynyň türkmen tarapynyň düzümini tassyklap, degişli resminama gol çekdi.
Döwlet Baştutanymyz şeýle hem «Edebiýat, medeniýet we sungat işgärleriniň, höwesjeň aýdymçy ýaşlaryň hem-de zehinli çagalaryň arasynda Türkmenistanyň Prezidentiniň «Türkmeniň Altyn asyry» atly baýragyny almak ugrundaky bäsleşigi yglan etmek hakyndaky» Karara gol çekdi. Bu giň gerimli döredijilik çäresiniň çäklerinde, şeýle hem ýaş höwesjeň aýdymçylaryň «Ýaňlan, Diýarym!» telebäsleşigi hem-de zehinli çagalaryň arasynda «Garaşsyzlygyň merjen däneleri» bäsleşigi yglan edildi.
Milli Liderimiz Gurbanguly Berdimuhamedowyň Buýrugy bilen, Daşary işler ministrligine, Ministrler Kabinetiniň ýanyndaky Gidrometeorologiýa baradaky milli komitete hem-de Türkmenistanyň Prezidentiniň ýanyndaky Hazar deňziniň meseleleri boýunça Döwlet kärhanasyna 2018-nji ýylyň 30-31-nji oktýabrynda Aşgabatda Hazarýaka döwletleriň degişli wekiliýetleriň gatnaşmagynda Gidrometeorologiýa we Hazar deňziniň hapalanmagyna gözegçilik boýunça utgaşdyryjy komitetiň 23-nji mejlisini geçirmek tabşyryldy.
20-nji oktýabrda Türkmenistanyň Mejlisiniň altynjy çagyrylyşynyň nobatdaky üçünji maslahaty geçirildi, onda kadalaşdyryjy-hukuk namalarynyň birnäçesi, şol sanda «Ýerleriň meliorasiýasy hakynda», «Radioýygylyk spektri hakynda» we başga-da birnäçe Kanunlar kabul edildi.
Geçen hepdede Mejlisde Iordaniýa Haşimit Patyşalygynyň Türkmenistandaky Adatdan daşary we Doly ygtyýarly ilçisi Ismail Rifaýenden ynanç haty kabul edildi.
BMG-niň Baş Assambleýasynyň 73-nji maslahatynda öňe süren oňyn başlangyçlaryny durmuşa geçirmek boýunça Maksatnamanyň çäklerinde Daşary işler ministrliginde «Terrorçylyga garşy göreş boýunça milli we sebit mümkinçilikleri artdyrmak maksady bilen serhetleri goramak we doldurmak ulgamynda öňdebaryjy tejribe» atly okuw maslahaty geçirildi, ony ýurdumyzyň daşary syýasat edarasy BMG-niň Merkezi Aziýa üçin Öňüni alyş diplomatiýasy boýunça sebit merkezi hem-de BMG-niň Terrorçylyga garşy müdirligi bilen bilelikde gurady.
Beýik Ýüpek ýolunyň iň gowy ýörelgelerini berkitmek bilen, Täjigistanyň paýtagtynda hem-de bu ýurduň käbir beýleki sebitlerinde Türkmenistanyň Medeniýet günleri üstünlikli geçirildi.
(TDH-niň maglumatlary esasynda taýýarlanyldy).
“Nesil” gazeti,
23.10.2018ý.
