Türkmenistanyň Diplomatik işgärleriniň güni mynasybetli Türkmenistanyň Daşary işler ministrliginiň Halkara gatnaşyklary institutynda Türkmenistanyň Daşary işler ministrligi, Türkmenistanyň Bilim ministrligi, Türkmenistanyň Magtymguly adyndaky Ýaşlar guramasynyň Merkezi Geňeşi bilen bilelikde gurnamagynda tegelek stoluň başynda baýramçylyk gepleşigi geçirildi.
Oňa bu ýokary okuw mekdebiniň ýaş mugallymlary, talyplary hem-de Ýaşlar guramasynyň işjeň agzalary gatnaşdylar.
Gepleşikde çykyş edenler häzirki wagtda ýurdumyzyň köpugurly örän oýlanyşykly daşary syýasatyna dünýäde yzygiderli ösüşiň möhüm we aýrylmaz ugry hökmünde garalýandygyny we bu ugurda netijeli hyzmatdaşlygy berkitmek meselesi Türkmenistanyň oňyn bitaraplyk, hoşniýetli goňşuçylyk parahatsöýüjilikli “Açyk gapylar” syýasatyny durmuşa geçirmekde, şeýle hem halkara hyzmatdaşlygyny berkitmekde öňe sürýän teklipleriniň we başlangyçlarynyň her bir ynsanyň bagtyýar, abadan durmuşda ýaşamagyna gönükdirilýändigini uly buýsanç bilen nygtap geçdiler.
Gepleşigiň ahyrynda oňa gatnaşanlar Garaşsyz hemişelik Bitarap döwletimiziň dünýä bileleşigindäki abraý-mertebesiniň häzirki buýsançly döwürde ajaýyp öwüşginleriniň many-mazmunyny il içinde wagyz etmekde mundan beýläkde hem joşgunly zähmet çekjekdiklerine, mähriban Arkadagymyzyň hoşniýetli içeri we daşary syýasatyny dabaralandyrmakda tutanýerli, yhlasly goşantlaryny goşjakdyklaryny ynandyrdylar we dünýäde ösüş arkaly parahatçylyk ýörelgäni amal edýän bu ugurda dünýä nusgalyk işleri amala aşyrýan ýaşlaryň Hak Howandary Arkadag Prezidentimiziň janynyň sag, belent başynyň aman bolmagyny tüýs ýürekden arzuw etdiler.
Gurbanmyrat MUHAMMEDOW,
Türkmenistanyň Magtymguly adyndaky Ýaşlar guramasynyň Merkezi Geňeşiniň bölüm müdiri.
