Berkarar döwletimiziň bagtyýarlyk döwründe hormatly Prezidentimiziň taýsyz tagallalary netijesinde ýurdumyzyň ylym-bilim ulgamynda uly üstünlikler gazanylýar. Dürli bäsleşikleriň, olimpiadalaryň üsti bilen zehinli ýaşlar ýüze çykarylýar. «Türkmenistan – parahatçylygyň we ynanyşmagyň Watany» ýylynda Türkmenistanyň Döwlet çeperçilik akademiýasynyň talyplarynyň gazanan halkara üstünlikleri hem muňa aýdyň şaýatlyk edýär.
Mälim bolşy ýaly, Russiýa Federasiýasynyň «Erudit» merkezi tarapyndan halkara derejesinde dürli bäsleşikler geçirilýär, ol ýaryşlara talyp ýaşlarymyz yzygiderli gatnaşýarlar, üstünlikli çykyş edýärler. Bu merkeziň üstümizdäki ýylyň 11-12-nji fewralynda geçiren halkara çeperçilik bäsleşiginde hem akademiýamyzyň amaly-haşam sungaty, binagärlik we dizaýn sungaty fakultetleriniň talyplary Hanmyrat Mämmedow, Döwran Ataballyýew, Jennet Rejepowa we Mähri Ýazmyradowa dagy üstünlikli çykyş edip, 1-nji orna mynasyp boldular.
Belläp geçsek, ýeňiji bolan talyplarymyzyň 3-si halkara bäsleşigiň dünýä çeperçilik medeniýeti ugry boýunça dürli temalarda öz zehinlerini synadylar. «I.I.Şişkiniň döredijiligi» atly tema boýunça halypa mugallym, sungaty öwreniş ylymlarynyň kandidaty Nurýagdy Ýagşymyradowyň ýolbaşçylygynda akademiýamyzyň 5-nji ýyl talyby Hanmyrat Mämmedow üstünlikli çykyş edip, ol görnükli rus suratkeşi Iwan Iwanowiç Şişkiniň peýzaž eserlerini okuw dersleriniň dowamynda oňat öwrenendigini, özleşdirendigini görkezmegi başardy. Şeýle hem talybymyz Jennet Rejepowa uly mugallym Jumageldi Amangeldiýewiň ýolbaşçylygynda «Dünýä binagärliginiň merjenleri» atly tema boýunça halkara bäsleşige gatnaşyp, zehin-ukybyny görkezdi. «Leonardo da Winçi – Galkynyş döwrüniň ussady» atly temada bolsa akademiýamyzyň 3-nji ýyl talyby Mähri Ýazmyradowa çykyş edip, ussat suratkeşiň ömür we döredijilik ýoly boýunça taýýarlygynyň ýokarydygyny subut etdi.
Mundan başga-da, «EXPO sergileriň taryhy» atly temada halkara bäsleşige gatnaşan talybymyz Döwran Ataballyýew bäsdeşlerinden tapawutlanmagy, öňe saýlanmagy başardy. Ony bäsleşige akademiýamyzyň mugallymy Sanjarbek Ismaýylow taýýarlady.
Umuman, zehinli talyplarymyz tejribeli mugallymlardan alýan bilimlerini özleşdirýärler, okuw sapaklaryndan daşary halkara we döwlet derejesinde geçirilýän bäsleşiklerdir sergilere yzygiderli gatnaşyp, öz ukyp-başarnyklaryny görkezýärler.
Ýazgül BEGINÝAZOWA,
Türkmenistanyň Döwlet çeperçilik akademiýasynyň talyby.
