Tebigat gözelliginiň waspy
Ýakynda ÝUNESKO-nyň işleri barada Türkmenistanyň Milli toparynyň Sekretariaty hem-de Türkmenistanyň Magtymguly adyndaky Ýaşlar guramasynyň Merkezi Geňeşi tarapyndan Türkmenistanyň baý tebigatyny, taryhy medeni-ýadygärliklerini wagyz etmek, ýaşlaryň ekologiýa medeniýetini we tebigata aýawly garaýşyny kämilleşdirmek maksady bilen ýurdumyzyň umumybilim berýän mekdep okuwçylarynyň arasynda “Tebigaty goralyň!” atly fotosurat bäsleşigi geçirildi.
Okuwçylaryň bäsleşige ugradan fotosuratlarynda ýurdumyzyň baý tebigatynyň ajaýyplygy giňden beýan edilýär. Fotosuratlarda bäsleşige gatnaşyjylaryň Watanymyza, gözel tebigatymyza, ýurdumyzyň haýwanat we ösümlik dünýäsine bolan söýgüsiniň uludygy has ýakyndan duýulýar.
Bäsleşigiň eminler toparynyň gelen netijesine laýyklykda baş baýraga Daşoguz welaýatynyň Daşoguz şäherindäki ýaş fizikleriň we matematikleriň ýöriteleşdirilen 21-nji mekdebiniň okuwçysy Orazalyýew Bähbit, birinji orna Lebap welaýatynyň Çärjew etrabynyň 13-nji orta mekdebiniň 10-njy “B” synp okuwçysy Rozyýewa Lala, ikinji orna Balkan welaýatynyň Balkanabat şäheriniň iňlis dili, fizika we matematika derslerini çuňlaşdyryp öwredýän ýöriteleşdirilen 22-nji orta mekdebiniň 11-nji “Ç” synp okuwçysy Ýarjanow Ysmaýyl, üçinji orna Daşoguz welaýatynyň Daşoguz şäherindäki ýaş fizikleriň we matematikleriň ýöriteleşdirilen 21-nji orta mekdebiniň 8-nji “D” synp okuwçysy Çopanow Gulmämmet dagylar mynasyp boldular.
Mukaddes Garaşsyzlygymyzyň şanly 30 ýyllyk toýunyň toýlanylýan «Türkmenistan – parahatçylygyň we ynanyşmagyň Watany» ýylynda ýene-de bir ýatdan çykmajak ajaýyp pursatlara eýe bolan bu bäsleşigiň ýeňijileri Hormat hatlary we gymmat bahaly sowgatlar bilen sylaglandylar.
Bäsleşige gatnaşyjy okuwçylar özleri üçin şeýle uly mümkinçilikleri döredip berýän hormatly Prezidentimize tüýs ýürekden çykýan alkyşlaryny beýan etdiler.
Merjen MUHAMMEDOWA,
Türkmenistanyň Magtymguly adyndaky
Ýaşlar Guramasynyň Merkezi Geňeşiniň
Halkara hyzmatdaşlygy bölüminiň baş hünärmeni.
