Şu gün Türkmenistanyň Magtymguly adyndaky Ýaşlar guramasynyň Merkezi Geňeşinde Türkmenistanyň Prezidenti Gurbanguly Berdimuhamedowyň öňe süren “Dialog – parahatçylygyň kepili” diýlip atlandyrylan häzirki zaman halkara gatnaşyklarynyň täze filosofiýasyny döretmek baradaky başlangyjynyň ýurdumyzyň jemgyýetçilik durmuşyndaky ähmiýetini çuňlaşdyrmaga bagyşlanyp, “Dialog – parahatçylygyň kepili” atly onlaýn maslahaty geçirildi. Maslahatda ÝUNESKO-nyň işleri barada milli toparyň jogapkär sekretarynyň, Türkmenistanyň Parahatçylyk gaznasynyň müdiriýetiniň başlygynyň, Türkmenistanyň Magtymguly adyndaky Ýaşlar guramasynyň Merkezi Geňeşiniň başlygynyň, Türkmenistanyň Zenanlar birleşiginiň Merkezi Geňeşiniň başlygynyň, Türkmenistanyň Medeniýet ministrliginiň hem-de Türkmenistanyň Ylymlar akademiýasynyň Taryh we arheologiýa institutynyň wekilleriniň çykyşlary diňlenildi. Çykyş edenler Milli Liderimiziň sebitde we dünýäde parahatçylygy üpjün etmek ugrunda öňe sürýän başlangyçlarynyň dünýä jemgyýetçiligi tarapyndan uly goldawa eýe bolýandygyny uly ruhubelentlik bilen bellediler.
Arkadag Prezidentimiziň parasatly baştutanlygynda Garaşsyz, baky Bitarap Türkmenistan ýurdumyzyň at-abraýy has belende göterilýär. Ýurdumyzyň daşary syýasatynda hoşniýetli goňşuçylygy, parahatçylygy pugtalandyrmak, dünýä döwletleri bilen dost-doganlyk gatnaşyklaryny ösdürmek ýaly ugurlara has hem uly üns berilmegi dünýä jemgyýetçiligi tarapyndan «Türkmenistan parahatçylygyň we ynanyşmagyň Watany» diýlip tanalmagyna halkara meýdanynda uly
at-abraýa eýe bolmagyna getirýär. Munuň aýdyň subutnamasyna bolsa, Milli Liderimiziň daşary syýasatda alyp barýan oňyn Bitaraplyk ýörelgesiniň halkara derejesinde ykrar edilmeginden, abraýly halkara guramasy bolan Birleşen Milletler Guramasy, onuň düzümindäki halkara guramalary bilen özara gatnaşyklarda öňe sürlen parahatçylyk ýörelgeleriniň dünýä jar edilmeginden görmek bolýar diýip çykyş edenler bellediler.
Maslahatyň ahyrynda tutuş adamzadyň bähbidine gönükdirilen beýik we dünýä nusgalyk işleri durmuşa geçirýän Gahryman Arkadagymyzyň janynyň sag, ömriniň uzak bolmagyny tüýs ýürekden arzuw etdiler.
Merjen NURMUHAMMEDOWA,
Türkmenistanyň Magtymguly adyndaky
Ýaşlar guramasynyň Merkezi Geňeşiniň
esasy hünärmeni.
