Saýat etrabyndaky 26-njy orta mekdebiň 4-nji synp okuwçysy Şöhle Mämiýewa Lebap welaýatynda ýylyň «Iň eýjejik gyzjagazy» diýlip yglan edildi. Türkmenistanyň Magtymguly adyndaky Ýaşlar guramasy we Bilim ministrligi tarapyndan yglan edilen bäsleşigiň welaýat tapgyry ýakynda Türkmenabat şäherindäki «Türkmeniň Ak öýi» binasynda geçirildi.
Milli bahar baýramy mynasybetli orta mekdepleriň 2—4-nji synplarynda okaýan okuwçy gyzlaryň arasynda geçirilýän «Iň eýjejik gyzjagaz ― 2022» bäsleşigine etraplarda geçirilen deslaply tapgyrda ýeňiji bolanlar gatnaşdylar. Welaýatyň dürli künjeklerinden gelen zehinli gyzjagazlaryň 24-si emin agzalarynyň we bäsleşige tomaşa etmäge gelenleriň öňünde özleriniň ukyp-başarnyklaryny görkezdiler. Olar saz çalyp, aýdym aýtmakda, milliligi wasp etmekde, el işlerini ýerine ýetirmekde bäsleşdiler.
Saýatly zehinlije gyzjagazndan soňra Çärjew etrabyndaky 31-nji orta mekdebiň 2-nji synp okuwçysy Milana Döwletowa ikinji, Türkmenabat şäherindäki ýöriteleşdirilen 39-njy orta mekdebiň 2-nji synp okuwçysy Läle Haýytmyradowa we Halaç etrabyndaky 13-nji orta mekdebiň 4-nji synp okuwçysy Şeker Sapaýewa dagylar üçünji orunlara mynasyp boldular. Ýeňijiler bäsleşigiň döwlet tapgyryna gatnaşmaga hukuk gazandylar.
Olara bäsleşigi guraýjylar tarapyndan Hormat hatlary we gymmat bahaly sowgatlar gowşuryldy.
Merjen WEPAÝEWA,
Halaç etrabynyň 40-njy
orta mekdebiniň mugallymy.
