Eziz Watan, şirin-janym,
Jigerden söýmüşem seni.
Jebraýylnyň öz Byragyn,
Söýen dek söýmüşem seni.
Basyp bagra dag-deräňi,
Keramat diýp her seräňi,
Adam ataň How enäni,
Söýen dek söýmüşem seni.
Keşt edip jümle jahany,
Tapabilmen seň bahaňy,
Patyşaň garyp Güljahany,
Söýen dek söýmüşem seni.
Sen ruhumyň belent bady,
Sen göwnümiň baky şady,
Perwananyň alaw-ody,
Söýen dek söýmüşem seni.
Al, ähli süňňüm, aňymy,
Bagş edem hanymanymy,
Gülruhyň Öwezjany
Söýen dek söýmüşem seni.
Köňlüme kybap heňlini,
Tapmanam degre-deňlini,
Magtymgulynyň Meňlini,
Söýen dek söýmüşem seni.
Epsem saňa ursam dyzym,
Galsa sende süňňüm-yzym,
Ejem janyň Şirin gyzyn
Söýen dek söýmüşem seni.
Gülşirin HANOWA.
