Berkarar döwletimiziň Täze eýýamynyň galkynyşy döwründe, «Halkyň Arkadagly zamanasy» ýylynda ýurdumyzyň taryhy ýadygärliklerini dikeltmekde, gorap saklamakda, olary geljekki nesillere ýetirmekde, BMG-niň Bilim, ylym we medeniýet boýunça guramasy bolan ÝUNESKO-nyň medeni mirasynyň sanawyna goşmakda ÝUNESKO-nyň işleri barada Türkmenistanyň Milli toparynyň Sekretariatynyň işleri örän uludyr. Şunuň bilen baglylykda 2022-nji ýylyň 18-19-njy noýabry aralygynda «Türkmenistan – ÝUNESKO: Diýardan ýaýran ýollar» atly şygar astynda ÝUNESKO-nyň işleri barada Türkmenistanyň Milli toparynyň Sekretariatynyň, Türkmenistanyň Zenanlar birleşiginiň Merkezi Geňeşiniň, Türkmenistanyň Medeniýet ministrliginiň, Türkmenistanyň Magtymguly adyndaky Ýaşlar guramasynyň Merkezi Geňeşiniň we Lebap welaýat häkimliginiň bilen bilelikde guramagynda «Köýtendag – türkmen tebigatynyň täsinliklere baý bolan ajaýyp künjegidir!» atly maslahat geçirildi. Maslahatyň birinji gününde Lebap welaýatynyň taryhy ýerleriniň biri bolan Gadymy Amul galasyna gezelenç gurnaldy. Gezelenje medeniýet we bilim ulgamlarynyň, Lebap welaýat jemgyýetçilik guramalarynyň wekilleri hem-de talyp ýaşlar gatnaşdylar.
Günüň ikinji ýarymynda Lebap welaýatynyň taryhy we ülkäni öwreniş muzeýine aýlanyldy. Şeýle hem Lebap welaýat kitaphanasynyň binasyna baryldy. Bu ýerde Lebap welaýatynyň birnäçe pudagyndan wekilleriň gatnaşmagynda «Köýtendag – türkmen tebigatynyň täsinliklere baý bolan ajaýyp künjegidir!» atly maslahat geçirildi. Maslahatyň dowamynda çykyşlara giň orun berildi, şeýle-de Köýtendag barada dokumental filme tomaşa edildi.
Maslahatyň barşynda oňa gatnaşyjylaryň her biri taryhy ýadygärliklerimizi dikeltmekde we gorap saklamakda uly işleri durmuşa geçiren Gahryman Arkadagymyza hem-de bu işleri üstünlikli dowam etdirýän Arkadagly Serdarymyza minnetdarlyklaryny bildirip, olara jan saglyk hem-de umumadamzat işlerinde rowaçlyklary arzuw etdiler.
