Türkmenistanyň Magtymguly adyndaky Ýaşlar guramasynyň Daşoguz welaýatynyň Boldumsaz etrap Geňeşi, etrabyň 2-nji çagalar we ýetginjekler sport mekdebinde 2008 – 2011-nji ýyllarda doglan ýetginjekleriň arasynda etrabyň birinjiligini almak ugrunda, “Sport – saglygymyzyň hemişelik hemrasy” atly şygar astynda sportuň grek-rim göreşi görnüşi boýunça bäsleşik geçirdi. Bu geçirilen ýaryş diýseň gyzykly hem çekeleşikli ýagdaýda geçdi. Ýaryşyň guramaçylyk we eminler toparynyň gelen netijelerine görä, ýaryşyň ýeňijileri yglan edildi. Ýeňijilere, şeýle hem işjeň gatnaşanlara TMÝG-niň ýerli Geňeşiniň Hormat hatlary dabaraly ýagdaýda gowşuryldy.
***
Türkmenistanyň Magtymguly adyndaky Ýaşlar guramasynyň Daşoguz welaýat Geňeşi, Daşoguz welaýat kitaphanasynyň mejlisler jaýynda, “Türkmenistanyň durmuş-ykdysady ösüşi – halkymyzyň bagtyýarlygynyň kepili” atly maslahat geçirdi. Dabaraly maslahata welaýatyň nebit-gaz, geologiýa pudagynda zähmet çekýän ýaşlar, TMÝG-niň ýerli Geňeşiniň wekilleri gatnaşdylar. Maslahatda çykyş edenler, ýurdumyzyň nebit-gaz pudagynda ýetilen sepgitler, gazanylan üstünlikler dogrusynda giňişleýin ýürek buýsançlaryny beýan etdiler. Maslahatda bu pudaklarda zähmet çekýän öňdebaryjy ýaşlara TMÝG-niň Daşoguz welaýat Geňeşiniň ýadygärlik sowgatlary gowşuryldy. Bu çäre ýokary ruhubelentlik ýagdaýynda geçdi.
***
Türkmenistanyň Magtymguly adyndaky Ýaşlar guramasynyň Daşoguz welaýatynyň Akdepe etrap Geňeşi, etrabyň hünär-tehniki okuw mekdebiniň talyplarynyň gatnaşmaklarynda, “Watan goragy mukaddesdir” atly wagyz-nesihat çäresini geçirdi. Bu çäre ýaşlaryň arasynda watançylyk terbiýesini ýokarlandyrmak, olara Watan mukaddesligini we gymmatlygyny wagyz etmek maksady bilen geçirildi. Çärede ýerli jemgyýetçilik guramalarynyň wekilleriniň hem-de hünär-tehniki okuw mekdebiniň mugallymlarynyň çykyşlary diňlenildi. Çykyşlarda “Halkyň Arkadagly zamanasy” ýylynda ýetilen belent sepgitler, Watan mukaddesligi, milli ýol ýörelgelerimiz dogrusynda giňişleýin bellenip geçildi.
***
Türkmenistanyň Magtymguly adyndaky Ýaşlar guramasynyň Daşoguz welaýatynyň Görogly etrap Geňeşi etrabyň bilim we medeniýet bölümleri bilen bilelikde, etrabyň daşary ýurt dillerine ýöriteleşdirilen 65-nji orta mekdebinde, etrabyň çäginde ýerleşýän orta mekdeplerde bilim alýan okuwçylaryň arasynda “Magtymguly sözlerim, saza salsaň uz bolar” atly döredijilik bäsleşigini uly ruhubelentlikde geçirdi. Oňa höwesjeň, zehinli okuwçylaryň 20-ä golaýy gatnaşyp, öz ukyp-başarnyklaryny görkezdiler.
Ýaşlaryň çeper edebiýata, nusgawy şahyrlarymyzyň goşgularyny okamaklyga bolan höweslerini artdyrmak, aýdym-saz sungatynda ukyp-başarnyklaryny açyp görkezmek, şygryýetiň saz bilen utgaşanda emele getirýän täsin sungaty çagalaryň aňyna ýetirmek, türkmen halkynyň beýik akyldary Magtymguly Pyragynyň döredijiligini çagalaryň çuňňur öwrenmeklerini gazanmak, zehinli, bilimli, watansöýüji ýaşlary kemala getirmek maksady bilen guralan döredijilik bäsleşigi ýatda galyjy pursatlara baý boldy. Gezekli-gezegine sahna çykyp, bäsleşigiň şertleri esasynda çykyş eden okuwçylaryň ýerine ýetirijilik başarnygy ol ýere ýygnananlarda uly täsirleri döretdi. Akyldar şahyrymyz Magtymguly Pyragynyň bir goşgysyny ýatdan aýtmak, şeýle hem Magtymgulynyň sözlerine döredilen halk aýdymlarynyň birini ýerine ýetirmek boýunça özara bäsleşdiler.
Şatlyk-şowhunly geçen bäsleşigiň emin agzalary çagalaryň sahna başarnygyny, ukybyny, sahnada özüni alyp baryşlaryny göz öňünde tutup, ýeňijileri kesgitlediler. Netije-de, 7-nji orta mekdebiň 6-njy synp okuwçysy Kuwat Parahadow 1-nji, 43-nji orta mekdebiň 6-njy synp okuwçysy Begmyrat Orazow 2-nji, 65-nji orta mekdebiň 5-nji synp okuwçysy Seýitmuhammet Atabaýew 3-nji orna mynasyp boldular. Bäsleşigiň ýeňijilerine we oňa işjeň gatnaşan okuwçylara TMÝG-niň ýerli Geňeşiniň we etrap bilim bölüminiň Hormat hatlary gowşuryldy.
