Türkmenistanyň hormatly Prezidenti Serdar Berdimuhamedowyň Berkarar döwletiň täze eýýamynyň Galkynyşy döwründe milli medeniýetimizi ösdürmek baradaky tagallalaryndan gelip çykýan wezipelerinden ugur alyp, medeniýeti, sungaty, halk döredijiligini has-da kämilleşdirmek, zähmetkeş halkymyza edilýän medeni hyzmatlaryň hilini ýokarlandyrmak, ösüp gelýän ýaş nesilleriň medeniýete bolan garaýyşlaryny ýokary derejede ösdürmek maksady bilen Balkan welaýat medeniýet müdirligi, Türkmenistanyň Magtymguly adyndaky Ýaşlar guramasynyň Balkan welaýat Geňeşi bilen bilelikde “Arkadag Serdarly bagtyýar ýaşlar ýylynda” Balkan welaýatyň etrap-şäher medeniýet merkezleriniň döredijilik toparlarynyň arasynda “Mirasa sarpamyz, has beýgelder bizi, Arkadag Serdarly, bagtyýar ýaşlar ýyly” atly döredijilik bäsleşigini geçirdi. Bäsleşik iki sany şertden birinji şerti milli tans, halk äheňinde, ikinji şerti şahyrana halk döredijiliginden, üme dessuryndan ybarat boldy. Ýaş zehinleriň ýerine ýetiren milli tanslary we döredijilik çykyşlary çärä gatnaşyjylara ruhy lezzet paýlady. Bäsleşigiň şertlerine laýyklykda 1-nji şerti boýunça baş baýraga Magtymguly etrabynyň “Elwan” tans topary, I orna Gyzylarbat etrabynyň “Şelpeler” tans topary, II orna Türkmenbaşy etrabynyň “Kenar” tans topary, III orna Bereket etrabynyň “Güljan” tans topary mynasyp boldylar. Bäsleşigiň 2-nji şerti boýunça baş baýraga Gyzylarbat etrabynyň “Köpetdag” halk folklor topary, I oruna Türkmenbaşy etrabynyň “Kenar” tans topary, II orna Magtymguly etrabynyň “Sumbar” halk folklor topary, III orna Esenguly etrabynyň “Küştdepdi” folklor topary mynasyp boldylar.
Bäsleşikde üstünlikli çykyş edip baýrakly orunlara mynasyp bolan we tapawutly çykyş eden tans toparlaryna Balkan welaýat medeniýet müdirligi tarapyndan hormat hatlar, Türkmenistanyň Magtymguly adyndaky Ýaşlar guramasynyň Balkan welaýat Geňeşi tarapyndan bolsa gymmat bahaly sowgatlar dabaraly ýagdaýda gowşuryldy. Welaýatymyzyň ýaş zehinleri döredip berilýän şeýle giň mümkinçilikler üçin Arkadagly Serdarymyza çäksiz alkyşlaryny aýtdylar.
Gözel SAPARMÄMMEDOWA,
TMÝG-niň Balkan welaýat Geňeşiniň
Guramaçylyk bölüminiň müdiri.
