«Arkadagly Ýaşlar» atly täze elektron žurnaly okyjylaryna gowuşdy. Türkmenistanyň Magtymguly adyndaky Ýaşlar «Arkadagly Ýaşlar» atly žurnaly elektron görnüşde okyjylara ýetirildi. Žurnalyň «www.turkmenmetbugat.gov.tm» web saýty arkaly guramanyň VIII Gurultaýynyň geçirilýän günlerinde paýlaşylmagy ýaşlara sowgat boldy.
Täze neşir «Arkadagdan Arkaly biz» atly giriş makalasy bilen başlanýar. Makalada hem nygtalyşy ýaly, ýurdumyzyň ýaşlarynyň bagtyýarlygyny, Arkadag Serdarly döwletimizi dabaralandyrýan ýylda žurnalyň ilkinji sanynyň okyjylara gowuşmagy redaksiýanyň agzybir döredijilik işgärleri üçin belent mertebedir. Türkmenistanyň Gahrymany, şahyr Gözel Şagulyýewanyň «Arkadag Serdarly bagtyýar ýaşlar!» atly şygrynyň ýerleşdirilmegi täze neşir şowly başlangyç boldy.
Türkmenistanyň Magtymguly adyndaky Ýaşlar guramasynyň Merkezi Geňeşiniň başlygynyň uly göwrümli makalasy hormatly Prezidentimiziň «Belent maksatlara ýetmekde ýurdumyzyň ýaş nesillerine» aýratyn bil baglaýarys» diýen sözlerine salgylanma bilen başlanýar.
Makalalaryň ýene biri paýtagtymyzyň ýakynynda bina bolýan Arkadag şäherine bagyşlandy. «Arkadag şäheri ― baky bagtyýarlygyň mekany» diýlip atlandyrylan makalada ýurdumyzdaky ilkinji «akylly» şäheriň, ilkinji nobatda, ýaşlar üçin uly sowgatdygy aýratyn nygtalýar.
Täze neşiriň ilkinji sanynda Türkmenistanyň Magtymguly adyndaky Ýaşlar guramasynyň Merkezi Geňeşiniň hünärmenleriniň we işjeň agzalarynyň gatnaşmagynda taýýarlanylýan gepleşiklere hem aýratyn orun berildi.
Neşir ýurdumyzyň ýaş alymlarynyň ylmy gözleglerine hem sahypalaryndan orun bermegi meýilleşdirýär.
Şu günki ýaşlaryň geljegimiziň mynasyp eýeleri bolup ýetişmegi, ilkinji nobatda, olaryň könelerimizden gelýän edep-terbiýe mekdebinde taplanmagyna baglydyr. «Edepli ile ýarar» atly makalada hut şu meselä üns çekilýär.
Türkmenistanyň Saglygy goraýyş we derman senagaty ministrliginiň Saglygy goraýşyň habarlar merkezi tarapyndan taýýarlanylan makalada çaganyň kemala gelmeginde ene-atanyň ornuna aýratyn üns çekilýär.
«Ähli mümkinçilikleriň dili» atly makala iňlis dilini öwrenmegiň ähmiýetine bagyşlanýar. Türkmen ýaşlary tarapyndan hem uly gyzyklanma bilen öwrenilýän bu dili bilmegiň aýratynlyklary baradaky gyzykly maglumatlar okyjylarda gyzyklanma döretse gerek.
Şeýle-de, täze neşirde döwrebap sanly ulgamyň mümkinçiliklerine, Türkmenistanyň Magtymguly adyndaky Ýaşlar guramasynyň Merkezi Geňeşiniň resmi web saýtyna, ýaşlaryň döredijiligine bagyşlanan makalalardyr söhbetdeşlikler öz ornuny tapypdyr. Okyjylar ýaşlaryň kanuny hukuklaryna, Gulbaba adyndaky çagalar baýragynyň ýaş nesliň döredijilik ruhuny artdyrmakdaky ornuna bagyşlanan makalalardan hem gyzykly maglumatlary öwrenip bilerler. Ýaş türkmen şahyrlarynyň goşgularynyň asyl nusgasy bilen olaryň iňlis dilindäki terjimeleriniň bilelikde ýerleşdirilmegi hem täsirli bolupdyr.
Täze neşir eýýäm ilkinji sanyndan ýurdumyzyň döredijilik bilen meşgullanýan ýaşlarynyň arasynda «Ýaş waspçy» atly döredijilik bäsleşigini yglan edýär. Bäsleşigiň esasy aýratynlygy onda diňe bir türkmen dilindäki däl, eýsem rus we iňlis dillerindäki makalalaryň hem kabul ediljekligindedir.
