Topragy mähriban enä deňelen eziz Watanymyzda halkymyzyň mukaddeslik derejesinde eý görýän eziz zatlary bolýar. Bulutlara boýdaş bolan daglaryň, owadan sähraly al-ýaşyl güller, gülälekdir jümjümelere beslenen tebigatymyzyň gözelligi adamlaryň ýüregine nagyş çekýär. Her bir adamyň ruhy dünýäsini dürli pikir ýöretmelere atarýan, joşgunly kalbyňy heýjana getirip, müň dürli kerem-keramatly gudraty bilen ynsan kalbyna ylham bolup dolýan gözel tebigatyň täsinliklerini gorap saklamak her birimiz üçin mukaddes borçdur.
Asyrlar boýy arzuwlap gelýan türkmen halky, bu gün halky üçin arman ýadaman zähmet çekýän Arkadagly Serdarymyzyň saýasynda berkarar döwletiň täze eýýamynyň galkynyşy döwründe asuda ýurtda öz arzuwlaryny amal edip, ata-babalarymyzyň, ene-mamalarymyzyň däp-dessurlaryny dikeltmekde öňe itergi berýän Hormatly Prezidentimize alkyşlar aýdyp ýaşaýarlar. Şol däp-dessurlarymyzyň biride kenarýaka türkmenleriniň balykçylyk bilen meşgullanmaklary we balykdan dürli tagamlary taýýarlamak häzirki döwürde dowam edip gelýär. Balykdan ýahana, gowurdak we düşeme palawlaryny, gaplama ýaly tagamlary mysal getirip hem bolýar. Ene-mamalarymyz muňa mysal getirip gazallaryň üsti bilen beýan edipdirler.
Balykdan aş bişirdik,
Düşeme hem ýahana,
Rowaçlygyň ýalkymy
Düşýär älem jahana
Balyklar düzüm-düzüm,
Ýola garap dur gözüm,
Watanymyň şöhraty,
Dünýä ýaň salýar bu gün
Hazarymyň balygy
Tagamlydyr süýjüdir,
Bizi bagta ýetiren
Prezidentimiziň güýjidir.
Düşeme palawy (10 adamlyk)
- Bekre balygy – 3 kg
- Tüwi – 3 kg
- Käşir – 3 sany
- Kartoşka – 3 sany
- Sogan – 3 sany
- Kakadylan erik we üzüm – 200 gr
Ilki bilen gazanymyza suw guýup suwymyzy gaýnatýarys gaýnan suwa duz atyp ýuwulan tüwini 15 minut gaýnadyp süzgüç bilen süzüp alýas. Ondan soň gazanymyzy arassalap ýag guýýas ýagymyz ýanansoň ýaňky süzen tüwimizden bir kepkir alyp gazanyň düýbine guýýas, soň öňünden duzlap goýan balygymyzy düzýäs, düzülen balygyň üstüne kartoşkany, käşiri halka görnüşinde kesip erik we üzümi üstüne goýmaly. Taýyn hurşy üstüni daş tabak bilen örtüp onuň üstüne galan tüwini goýup ýarym sagat demine bişirmeli.
Baýramgül SAFAROWA,
Türkmenistanyň Magtymguly adyndaky
Ýaşlar guramasynyň Balkanabat şäher
Geňeşiniň guramaçylyk bölüminiň
baş hünärmeni.
