Berkarar döwletiň täze eýýamynyň Galkynyşy döwründe ýurdumyzyň ilatynyň, ösüp gelýän ýaş nesilleriň ýol hereketiniň kadalary boýunça bilimlerini artdyrmak maksady bilen wagyz-nesihat işleri geçirilýär.
Ýakynda Türkmenistanyň Bilim ministrliginiň, Türkmenistanyň Magtymguly adyndaky Ýaşlar guramasynyň Merkezi Geňeşiniň, Türkmenistanyň Içeri işler ministrliginiň kämillik ýaşyna ýetmedikleriň we ýaşlaryň arasyndaky hukuk bozulmalaryň öňüni alyş bölüminiň guramagynda Türkmenistanyň Içeri işler ministrliginiň Polisiýanyň ýol gözegçiligi müdirliginiň ýanyndaky Çagalar awtoşäherçesinde «Ýol hereketiniň howpsuzlygy — ömrümiziň rahatlygy» atly gezelenç çäresi geçirildi.
Bu çärä Gökdere jülgesinde ýerleşýän «Nesil», «Nebitçi», «Şöhle», «Çeşme», «Beýik Serdaryň ruhubelent nesilleri» dynç alyş we sagaldyş merkezlerinde wagtlaryny şadyýan geçirýän çagalar gatnaşdylar.
Mekdep okuwçylarynyň tomusky dynç alyş möwsüminiň dowam edýän şu günlerinde çagalaryň arasynda geçirilýän wagyz-nesihat, düşündiriş işleri çagalaryň saglygyny goramakda, ýol hereketiniň kadalarynyň dogry berjaý edilmegini gazanmakda möhüm ähmiýete eýedir. Çagalar awtoşäherçesinde çagalara ýol hereketiniň kadalaryny öwretmek üçin döwrebap enjamlaşdyrylan okuw we kompýuter otaglary, kinozal, tejribe meýdançalary ýerleşýär. Çagalaryň ýol hereketiniň howpsuzlygyny dogry berjaý etmeklerini gazanmak maksady bilen, bu ýerdäki tejribe meýdançalarynda pyýadalar üçin geçelgeler, ýoluň gatnaw bölegini, çatryklary aňladýan ýol çyzgytlary, ýol hereketini düzgünleşdirýän ýol yşyklary bar. Bu bolsa çagalaryň ýol hereketiniň kadalaryny berjaý etmegine, köçe-ýol kadalaryny dogry özleşdirip, endige öwürmegine ýardam edýär.
Türkmenistanyň Içeri işler ministrliginiň Polisiýanyň ýol gözegçiligi müdirliginiň ýanyndaky çagalar awtoşäherçesiniň mugallymy Narbaý Gylyjow Gökderede dynç alýan çagalar bilen multimedia tagtada terbiýeçilik ähmiýetli düşündiriş işlerini alyp baryp, ýol hereketine degişli birnäçe slaýdlary görkezdi. Mugallym çagalaryň düşünjelerini berkitmek maksady bilen sowal-jogap alyşdy. Bu bolsa guralan çäräniň terbiýeçilik ähmiýetini has-da artdyrdy.
Gahryman Arkadagymyzyň tagallasy bilen 2015-nji ýylyň awgust aýynda çagalar awtoşäherçesi döredildi. Geljegimiz bolan ýaş nesilleriň saglygyny goramak, olaryň howpsuzlygyny üpjün etmek, ýol-ulag hadysalarynyň öňüni almak maksady bilen düşündiriş işlerini alyp barýarys. Çagalar awtoşäherçesiniň esasy maksady hem mekdep okuwçylaryna, mekdebe çenli çagalar edaralarynyň uly toparlarynda terbiýelenýän körpelere köçelerde we ýollarda howpsuz hereket etme giň kadalaryny öwretmek boýunça goşmaça bilimleri bermekden, çagalaryň bu kadalary berjaý etmegini gazanmakdan ybarat bolup durýar. Bu ýerde guralýan okuwlar ýörite okuw maksatnamasy esasynda geçirilýär — diýip mugallym Narbaý Gylyjow gürrüň berdi.
Bu ýerde çagalara ýol hereketine degişli wideo şekiller, terbiýeçilik ähmiýetli kiçi göwrümli kinofilmler görkezildi. Tomusky dynç alşyň dowam edýän şu günlerinde çagalaryň her bir güni ýatdan çykmajak täsirlere baý bolan çäreler bilen utgaşýar.
Bägül BAÝGELDIÝEWA,
«Mugallymlar gazeti»
Surata düşüren
Ahmet TURŞEKOW.
