ÇUŇŇUR HORMATLANYLÝAN TÜRKMENISTANYŇ PREZIDENTI!
Sizi Arkadag Serdarly bagtyýar ýaşlar ýylynda Garaşsyz, hemişelik Bitarap Türkmenistanyň teklibi boýunça Birleşen Milletler Guramasynyň Bilim, ylym we medeniýet meseleleri boýunça guramasynyň (ÝUNESKO) Baş maslahatynyň 42-nji mejlisiniň dowamynda 2024-2025-nji ýyllarda ÝUNESKO bilen bilelikde bellenilip geçilýän şanly seneleri tassyklamak boýunça kabul edilen Kararnama laýyklykda, Magtymguly Pyragynyň 300 ýyllygynyň bu seneleriň sanawyna goşulmagy mynasybetli Türkmenistanyň Halk Maslahatynyň adyndan tüýs ýürekden, mähirli gutlaýaryn.
Hormatly Prezidentimiz!
Siziň parasatly baştutanlygyňyzda täze taryhy döwürde Birleşen Milletler Guramasynyň düzümleri, şol sanda ÝUNESKO bilen hyzmatdaşlyk yzygiderli ösdürilýär. Beýik akyldar şahyrymyzyň doglan gününiň 300 ýyllyk baýramçylygyny halkara derejede bellemek bilen bagly uly işleriň geçirilýän günlerinde Magtymguly Pyragynyň 300 ýyllygynyň ÝUNESKO bilen bilelikde bellenip geçiljek şanly seneleriň sanawyna goşulmagy, Arkadagly Gahryman Serdarymyz, Siziň baştutanlygyňyzda üstünlikli durmuşa geçirilýän medeni diplomatiýanyň, şol sanda görnükli nusgawy şahyrymyzyň umumadamzat medeni hazynasynyň aýrylmaz bölegi hasaplanýan gymmatly mirasyny gorap saklamak, öwrenmek we wagyz etmek boýunça alnyp barylýan işleriň üstünliklere beslenýändiginiň aýdyň beýanydyr. Siziň baştutanlygyňyzda geçmişiň, şu günüň hem geljegiň şahyry, pähim-paýhas ummany bolan Magtymguly Pyragynyň doglan gününiň 300 ýyllygynyň halkara jemgyýetçilik bilen bilelikde bellenilmegi akyldar şahyryň dünýä edebiýatynyň altyn hazynasyna giren baý hem-de gymmatly edebi mirasyny, dünýewi garaýyşlaryny, şygyrlaryndaky pelsepe älemini öwrenmekde, onuň döredijiliginiň türkmen halkynyň, şol sanda tutuş Gündogaryň ylmy-medeni durmuşy bilen aýrylmaz baglanyşygyny açyp görkezmekde, şahyrana dünýäsine halkara ylmy-edebi jemgyýetçiligiň ünsüni çekmekde möhüm ähmiýete eýe bolar.
Magtymguly Pyragy bütin dünýäde umumadamzat gymmatlyklarynyň genji-hazynasyna ägirt uly goşant goşan şahsyýet, akyldar hökmünde belent ykrarnama eýe bolan şahyrdyr. Häzirki döwürde beýik akyldaryň parahatçylyk, hoşniýetlilik, agzybirlik, adalatlylyk ýaly belent ynsanperwer ýörelgelere esaslanýan filosofik taglymy we döredijiligi umumadamzat gymmatlygy hökmünde içgin öwrenilýär.
Belent mertebeli Prezidentimiz!
Türki medeniýetiň halkara guramasynyň (TÜRKSOÝ) hemişelik geňeşiniň mejlisinde Magtymguly Pyragynyň 300 ýyllygy mynasybetli 2024-nji ýylyň «Türki dünýäniň beýik şahyry we akyldary Magtymguly Pyragy ýyly» diýlip yglan edilmegi, şahyryň golýazmalar toplumynyň ÝUNESKO-nyň «Dünýäniň hakydasy» maksatnamasynyň halkara sanawyna girizilmegi, Arkadagly Gahryman Serdarymyz, Siziň üstünlikli durmuşa geçirýän medeni diplomatiýaňyzyň, şol sanda umumadamzat medeni hazynasynyň aýrylmaz bölegi bolup durýan türki dilli halklaryň örän baý medeni mirasynyň goralyp saklanylmagyna, öwrenilmegine hem-de dünýäde wagyz edilmegine gönükdirilen syýasatyňyzyň üstünliklere beslenýändigine şaýatlyk edýär.
Sarpasy belent Prezidentimiz!
Ulus-ilimiz üçin ajap eýýamy arzuwlan akyldar şahyrymyzyň berkarar döwlet gurmak, Watanymyzyň binýadynyň berk bolmagy baradaky arzuwlary hasyl boldy. Berkarar döwletiň täze eýýamynyň
Galkynyşy döwründe Köpetdagyň eteginde gurulýan Magtymguly Pyragynyň ägirt uly ýadygärligi beýik şahyryň ömrüne, döredijilik mirasyna häzirki döwrüň nesilleri tarapyndan uly sarpa goýulýandygynyň aýdyň nyşanydyr. Akyldar şahyrymyzy mertebelemek, onuň beýik adyny ebedileşdirmek maksady bilen, diňe bir ýurdumyzda däl, eýsem, dünýä ýurtlarynda-da onuň ýadygärlikleriniň açylyp, adynyň köçelere, bilim ojaklaryna, binalara dakylmagy ussadyň dünýä derejesinde ykrar edilýändiginiň nobatdaky güwäsidir.
Hormatly Arkadagly Gahryman Serdarymyz!
Sizi Magtymguly Pyragynyň doglan gününiň 300 ýyllygynyň 2024-2025-nji ýyllarda ÝUNESKO bilen bilelikde bellenilip geçilýän şanly seneleriň sanawyna goşulmagy mynasybetli Türkmenistanyň Halk Maslahatynyň adyndan ýene-de bir gezek tüýs ýürekden, mähirli gutlaýaryn. Size berk jan saglyk, uzak ömür, il bähbitli, umumadamzat ähmiýetli tagallalaryňyzda rowaçlyklary arzuw edýärin.
Sizi hormatlamak bilen,
TÜRKMEN HALKYNYŇ MILLI LIDERI,
TÜRKMENISTANYŇ HALK MASLAHATYNYŇ BAŞLYGY,
GAHRYMAN ARKADAG
GURBANGULY BERDIMUHAMEDOW.
TDH
