Şekillendiriş we amaly-haşam sungaty bilen meşgullanýan ýaşlaryň arasynda «Pähim-paýhas ummany Magtymguly Pyragy» atly döredijilik bäsleşiginiň
DÜZGÜNNAMASY
I. Umumy düzgünler.
1. Şekillendiriş we amaly-haşam sungaty bilen meşgullanýan ýaşlaryň arasynda «Pähim-paýhas ummany Magtymguly Pyragy» atly döredijilik bäsleşiginiň (mundan beýläk – bäsleşik) Düzgünnamasy (mundan beýläk – Düzgünnama) bäsleşigi geçirmegiň tertibini, şertlerini we düzgünlerini kesgitleýär.
2. Bäsleşik Berkarar döwletiň täze eýýamynyň Galkynyşy döwründe Gündogaryň beýik akyldary we nusgawy şahyry Magtymguly Pyragynyň doglan gününiň 300 ýyllygyny dabaralandyrmak, akyldar şahyryň çuň many-mazmunly eserlerini giňden wagyz etmek, Magtymguly Pyraga bagyşlap täze, kämil şekillendiriş we amaly-haşam sungat eserlerini döretmek maksady bilen geçirilýär.
3. Bäsleşik Türkmenistanyň Medeniýet ministrligi we Türkmenistanyň Magtymguly adyndaky Ýaşlar guramasynyň Merkezi Geňeşi tarapyndan bilelikde geçirilýär.
4. Bäsleşigiň jemleri 2024-nji ýylyň iýun aýynyň birinji ongünlüginde Türkmenistanyň Döwlet çeperçilik akademiýasynda geçiriler.
5. Döwlet bäsleşigine ýurdumyzyň 35 ýaşa çenli raýatlary gatnaşyp bilerler.
II. Bäsleşigi geçirmegiň tertibi we şertleri.
1. Bäsleşik çeperçilik sungatynyň nakgaşlyk, heýkeltaraşlyk, külalçylyk, zergärçilik we halyçylyk ugurlary boýunça geçirilýär. Bu sungat eserlerinde nusgawy şahyr Magtymguly Pyragynyň nurana keşbine, döredijiligine we edebi mirasyna mahsus aýratynlyklar çeper şekillendirilmelidir hem-de akyldar şahyryň paýhas dünýäsi özboluşly açylyp görkezilmelidir. Magtymguly Pyraga bagyşlanyp döredilýän şekillendiriş we amaly-haşam sungaty eserleri täzeçilligi, döwrebaplylygy, adamlaryň kalbyna täsir edip bilýänligi bilen tapawutlanmalydyr.
2. «Pähim-paýhas ummany Magtymguly Pyragy» atly döredijilik bäsleşigine gatnaşýan ýaşlar özleriniň döreden iň täze heýkel, nakgaş, külal, zergärçilik we halyçylyk sungaty eserlerini hödürlemelidirler. Hödürlenýän eserler ýörite sergide goýmak üçin niýetlenen, ýagny nakgaş eserler çarçuwaly, heýkel işleri gips, palestr, agaç ýaly serişdelerinde bolmalydyr. Bäsleşige gatnaşyjylar özleri we döreden eserleri baradaky maglumatlaryny (ady, atasynyň ady, familiýasy, eseriň ady, ölçegi, materialy, döredilen ýyly) işiniň arka tarapynda ýelmenmelidir.
3. Bäsleşige gatnaşýan sungaty eserleri 2024-nji ýylyň 20-nji maýyna çenli Türkmenistanyň Döwlet çeperçilik akademiýasynyň Sergiler jaýyna tabşyrylmalydyr (Aşgabat ş. 2022-nji (A.Nowaýy) köçesiniň 90-njy jaýy).
4. Bäsleşige gatnaşan iň oňat eserleri ylmy esasda öwrenmek, olardaky täze döredijilik pikirlerini açyp görkezmek boýunça mugallymlaryň we talyplaryň taýýarlan makalalaryny ýurdumyzyň gazet-žurnallarynda çap etmek hem-de teleýaýlymlarda gepleşikleri taýýarlamak işlerini Türkmenistanyň Döwlet çeperçilik akademiýasynyň Ylym bölümi tarapyndan alnyp barylar.
III. Bäsleşigiň jemleri.
1. Bäsleşigiň netijeleri 2024-nji ýylyň iýun aýynyň birinji ongünlüginde Türkmenistanyň Döwlet çeperçilik akademiýasynyň Sergiler jaýynda açylan serginiň dowamynda Eminler toparynyň gatnaşmagynda jemlener. Magtymguly Pyragynyň çeper keşbini beýan edýän sungaty eserleri bu ýerde sergilenmek bilen, olaryň iň gowulary Eminler topary tarapyndan saýlanyp seçiler.
2. Bäsleşigiň Eminler toparynyň düzümi Türkmenistanyň Medeniýet ministrliginiň we Türkmenistanyň Magtymguly adyndaky Ýaşlar guramasynyň Merkezi Geňeşiniň bilelikdäki buýrugy bilen tassyklanylýar. Bäsleşigiň emin agzalary Türkmenistanyň tanymal suratkeşlerinden, sungaty öwrenijilerden, tejribeli mugallymlardan ybarat bolar.
3. Bäsleşigiň ýeňijileriniň orunlary her ugur boýunça aşakdaky tertipde kesgitlener:
Nakgaşlyk: Heýkeltaraşlyk:
I orun – 1 sany. I orun – 1 sany.
II orun – 2 sany. II orun – 1 sany.
III orun – 3 sany. III orun – 1 sany.
Külalçylyk: Halyçylyk:
I orun – 1 sany. I orun – 1 sany.
II orun – 1 sany. II orun – 1 sany.
III orun – 1 sany. III orun – 1 sany.
Zergärçilik:
I orun – 1 sany.
II orun – 1 sany.
III orun – 1 sany. Höweslendiriji baýraklar - 15 sany.
4. Bäsleşigiň ýeňijilerine Türkmenistanyň Medeniýet ministrliginiň hem-de Türkmenistanyň Magtymguly adyndaky Ýaşlar guramasynyň Merkezi Geňeşiniň Diplomlary, baýraklary hem-de tapawutlanan işlere Hormat hatlary, höweslediriji baýraklary dabaraly ýagdaýda gowşurylar.
5. Bäsleşigiň Eminler toparynyň çykaran netijesi gutarnykly bolup, gaýtadan seredilmeýär.
