Arzuwlaryň ak atyny eýerlän,
Sözlerini eken kalplara zerläp,
Geçmişi, şu güni, geljegi jemlän,
Bir supra çagyran ýakyn-yragy,
Şygryýete bezeg beýik Pyragy!
Mynasypdyr eserleriň tarypa,
Göreldedir olar alym, aryfa,
Ady müdimilik ornan taryha,
Ruhy halypamyz saýdyk Pyragy,
Şygryýete bezeg beýik Pyragy!
Dür dökülýär kitaplaryň gatyndan,
Ylhamyň joşgunyn almyş Watandan,
Mertebäň beýgelýär durmuş gatynda,
Paýhas ummanynda gaýyk Pyragy,
Şygryýete bezeg beýik Pyragy!
Geljegi, boljagy öňünden gören,
Taryhda yz goýan galamy bilen,
Yragy dost eýlän salamy bilen,
Il-günüň sylagna laýyk Pyragy,
Şygryýete bezeg beýik Pyragy!
Yhlas bilen zähmet çeken kän pasyl,
Eken söz meýdanyň berýär bol hasyl,
Nowjuwan atsa-da arka üç asyr,
Gaýtalanmaz genji-käniň Pyragy,
Şygryýete bezeg beýik Pyragy!
Arzuwlan döwletiň gaýym gurulmyş,
Berkararlyk ýoly bagta sowulmyş,
Dana şahyr bu gün tirsegne galmyş,
Ägirtleriň ägirdi sen, Pyragy,
Şygryýete bezeg beýik Pyragy!
Çeper NAZARGYLYJOWA,
Döwletmämmet Azady adyndaky Türkmen milli dünýä dilleri institutynyň talyby,
Türkmenistanyň Ýaşlar baýragynyň eýesi.
