Türkmenistanyň Prezidenti Serdar BERDIMUHAMEDOW:
— Beýik işler bilime daýanýar, bilim bolsa terbiýe bilen geçmeli gymmatlykdyr.
Hormatly Prezidentimiz geçen ýylyň jemlerine bagyşlanan Türkmenistanyň Ministrler Kabinetiniň giňişleýin mejlisinde Ahal welaýatynyň Ak bugdaý etrabyny 2023-nji ýylyň jemleri boýunça geçirilen bäsleşikde ýeňiji bolan etrap diýip yglan etmek we bu etrabyň häkimligini 1 million amerikan dollary möçberinde pul baýragy bilen sylaglamak hakynda Buýruga gol çekdi. Netijede, ýurdumyzyň iň gowy etraby diýen dereje ugrundaky bäsleşigiň ýeňijisi Ahal welaýatynyň Ak bugdaý etraby boldy, etrap häkimligine ABŞ-nyň 1 million dollary dabaraly ýagdaýda gowşuryldy.
Bu gazanylan üstünlikde tutuş etrabyň agzybir zähmetkeşleriniň uly paýy bar. Ýurdumyzyň bedew batly ösüşine mynasyp goşant goşmak, onuň her bir gadamyny ilerletmek ugrunda etrabyň ilaty yhlasly zähmet çekýär. Elbetde, bu Ak bugdaý etrabynyň bilim ulgamy babatynda hem şeýle. Biz hem öňdebaryjy etrabyň armasyny ýetirmek, bilim ulgamyndaky gazanan üstünliklerini öwrenmek maksady bilen etrabyň çäginde ýerleşýän tebigy we takyk ugurly okuw derslerini çuňlaşdyryp öwredýän ýöriteleşdirilen 46-njy orta mekdepde myhmançylykda bolduk.
Watanymyzyň ýaş baýdak göterijilerine bilim berýän bu mekdep 2021-nji ýylda açylyp, ol 960 okuwçy üçin niýetlenilendir. Döwrebap mekdebi göreniňde, Gahryman Arkadagymyzyň, Arkadagly Gahryman Serdarymyzyň başda durmagynda ýetilen beýik sepgitlere guwanýarsyň, çäksiz buýsanýarsyň. Häzirki günlerde üç gatly döwrebap orta mekdebiň binasynda «ruhy zähmet» gaýnap joşýar. Ony aňmak kyn däl. Sapak wagty bu ýere gelseň, mekdebiň okuw binasyndaky 55 sany synp otagda hem bilimden ýüki ýetik, tejribeli mugallymlar sapak berip durandyr. Şolaryň 5-si tejribe geçmek üçin niýetlenilipdir.
Mekdebiň lingafon, kompýuter enjamlary bilen üpjün edilen okuw otaglary-da aýratyn ünsüňi çekýär. Tebigy we takyk ugurlara ýöriteleşdirilen okuw otaglarynyň görkezme esbaplarynyň ýokary derejededigi sapak geçilende okuwçylara has-da täsir edýär. Ol esbaplaryň okuwçylaryň sapagy çuňňur özleşdirmeklerine ýakyndan ýardam edýändigini aýratyn bellemeli.
Himiýa, biologiýa, fizika dersleri boýunça tejribe otaglarynda geçirilýän sapaklar okuwçylarda aýratyn täsir galdyrýar. Şeýle hem mekdebiň içinde giň sport zaly bar. Onda okuwçylara ähli amatlyklar döredilip, sportuň futbol, woleýbol, basketbol ýaly görnüşleri üçin niýetlenilendir. Aýdym-saz dersi üçin ýörite otaglar, zähmet, gurnak otaglary hem döwrüň talabyna laýyk gurallar bilen üpjün edilipdir.
Tebigy we takyk ugurly okuw derslerini çuňlaşdyryp öwredýän ýöriteleşdirilen orta mekdebiň agzybir mugallymlary hem sanly ulgamyň mümkinçiliklerinden netijeli peýdalanyp, öz öňlerinde duran jogapkärli wezipeleri talabalaýyk ýerine ýetirýärler. Döredilen döwrebap şertlerde bilim alýan okuwçylar bolsa dersara we halkara bäsleşiklere gatnaşyp, baýrakly orunlara mynasyp bolýarlar. 2023 — 2024-nji okuw ýylynda «Altyn asyryň altyn zehinleri» atly ders bäsleşikleriniň etrap hem-de welaýat tapgyrynda ýeňiji bolanlary bar. Bu mekdebiň okuwçysy Dawut Muhammetgurbanow diňe bir ýurdumyzyň çäginde däl, 2023-nji ýylyň 1 — 10-njy fewraly aralygynda Gazagystan Respublikasynyň Ylym we bilim ministrligi tarapyndan onlaýn görnüşde matematika, fizika we informatika dersleri boýunça XIX halkara Žautykow bäsleşigine hem gatnaşyp, kümüş medala mynasyp boldy.
Arkadagly Gahryman Serdarymyz: «Ylymly, bilimli, giň dünýägaraýyşly, sagdyn pikirlenmäge ukyply nesil döwletiň hem, milletiň hem geljegi hasaplanýar» diýip belleýär. Geljegimiziň eýeleri bolan ýaş nesillere bilim bermekde mekdebiň mugallymlarynyň ýaşlara görelde bolýandygyny, olaryň işlerine döredijilikli çemeleşýändigini Ak bugdaý etrabyndaky tebigy we takyk ugurly okuw derslerini çuňlaşdyryp öwredýän ýöriteleşdirilen 46-njy orta mekdebiň müdiri Ýazgül Gylyjowa uly buýsanç bilen belleýär. Şeýle-de tejribeli müdir «Ahal welaýatynyň Ak bugdaý etrabynyň ýurdumyzyň iň gowy etraby diýen bäsleşigiň ýeňijisi bolmagy, Änew şäheriniň TÜRKSOÝ guramasy tarapyndan 2024-nji ýylda «Türki dünýäsiniň medeni paýtagty» diýlip yglan edilmegi bizi täze zähmet üstünliklerine ruhlandyrdy» diýip nygtaýar.
Hawa, ýurdumyzda ösüp gelýän ýaş nesilleri ylymly-bilimli, sowatly we giň dünýägaraýyşly edip ýetişdirmek üçin taýsyz tagallalar edilýär. Hormatly Prezidentimiziň taýsyz tagallalary netijesinde şeýle döwrebap innowasiýalar, tehnologiýalar we kämil enjamlar bilen üpjün edilen mekdepler yzygiderli gurlup ulanylmaga berilýär. Bu bolsa ýurdumyzda ýaş nesil hakyndaky aladanyň ileri tutulýandygyndan nyşandyr.
Şeýle buýsançly wakalaryň şaýady bolup, ýurduň öňdebaryjy etrabynda zähmet çekýän bilim ojagynyň wekilleriniň alyp barýan işlerinde üstünlikleriň ýaran bolmagyny tüýs ýürekden arzuw edýäris. Goý, Gahryman Arkadagymyzyň we Arkadagly Gahryman Serdarymyzyň saýasynda bilim ojagynyň alyp barýan asylly işleri mundan beýläk-de rowaç alsyn.
Garahanjar BAÝHANOW,
«Güneş».
