Ýakynda Türkmenistanyň Magtymguly adyndaky Ýaşlar guramasynyň Ahal welaýatynyň Bäherden etrap Geňeşiniň hem-de etrabyň bedenterbiýe we sport bölüminiň bilelikde guramagynda etrabyň sport mekdebinde sportuň küşt we stoluň üstünde oýnalýan tennis görnüşleri boýunça okuwçy gyzlaryň arasynda ýaryş geçirildi.
Milli bahar baýramyny dabaralandyrmak, okuwçy ýaşlary sporta giňden çekmek we sport ussatlyklaryny ýokarlandyrmak maksady bilen geçirilen ýaryş örän çekeleşikli boldy. Uly gyzyklanma döreden ýaryşyň netijesinde küşt boýunça etrabyň 30-njy orta mekdebiniň okuwçysy Leýli Geldiýewa birinji, 27-nji orta mekdebiniň okuwçysy Gülnäz Adylowa ikinji, şol mekdebiň okuwçysy Mylaýym Toýlyýewa üçünji orny eýeledi.
Stoluň üstünde oýnalýan tennis görnüşinde birinji, ikinji orunlara degişlilikde etrabyň 27-nji orta mekdebiniň okuwçylary doganlar Şirinaý, Ogulşeker Ýaranowalar, üçünji orna 28-nji orta mekdebiniň okuwçysy Mährigül Garamämmedowa mynasyp boldy. Ýeňijilere guramaçylar tarapyndan Hormat hatlarydyr ýadygärlik sowgatlar gowşuryldy.
Mamagözel BOZZYÝEWA,
TMÝG-niň Ahal welaýatynyň
Bäherden etrap Geňeşiniň işgäri.
