Pähim-paýhas ummany Magtymguly Pyragy,
Ägirtleriň ägirdi, şöhrat-şany halkymyň.
Hikmetler dünýäsiniň ýalkym saçýan çyragy,
Ideýalaryň röwşen, baýdak bolup galkynan,
Milliligiň howasy söz mülküňde bark urar.
Parasatly ündewi jemläp durmuş ýolundan,
Akyl doly sandygyň çar künjege keşt eder.
Ýürekleriň töründe orun alan eserleň,
Hakyň ýoluna uýýan köňüllere keşdedir.
Asylaryň synagyn mertlik bilen süýşüren,
Sap altyn deý şygyrlaň bakylygyň keşbidir.
Ussatsyň Akyldarym – şahyrlaryň serweri,
Mydam ýoluň ýörelge, waspyň Arşyň deňinde,
Maňzyn tirsem eserleň agzybirligiň tugy,
Ak gaýmak deý päkligi ak ertiriň heňinde.
Nur çaýylan sözleriň heniz täze terligi,
Ykrar boldy jahana şanly toýuň ýaňynda!
Milli Lider şygrynda belent tutup sarpaňy,
Adyňy äşgär etdi älemiň çar künjüne.
Guran paýhas şalygyň pajarlady, berkedi,
Taýdyr goja Zeminiň baýlygyna-genjine.
Ynsanyýet geljegin eýleýip ak ýollara,
Mynasyp bolduň halkyň ömürlik buýsanjyna.
Gudrat gördüm açamda kitaplaryň gatyny,
Ulamasyň, pirsiň sen söz älemniň mülküne.
Lebziňi halal tutup, ýöräp Hakyň ýolundan,
Yhlas bilen görk goşduň şygryýetiň görküne.
Pähim-paýhas ummany Magtymguly Pyragy
Yklymlara ýaň saljak şanly toýuň güwäsi.
Rowaçlyga ýar boljak ajap ýyla at beren,
Arkadagly Gahryman Serdarymyzyň paýhasy.
Guwanyp ajap döwre tirsegňe gal, şahyrym,
Ykrarsyň giň äleme danalaryň Danasy!
Çeper NAZARGYLYJOWA,
Döwletmämmet Azady adyndaky Türkmen milli dünýä
dilleri institutynyň talyby, Türkmenistanyň Ýaşlar baýragynyň eýesi.
