Pasyllaryň soltany bolan baharyň ajap çagynda giňden bellenýän Halkara Nowruz güni gözelligiň we joşgunly ýaşaýşyň nurana baýramydyr. Bu baýram dünýäniň ençeme halklarynda dabaraly bellenýär.
Nowruz baýramy 2009-njy ýylyň 30-nji sentýabrynda ÝUNESKO-nyň Adamzadyň maddy däl medeni mirasynyň sanawyna girizilipdi, şondan köp wagt geçmänkä, ýagny 2010-njy ýylyň fewral aýynda Birleşen Milletler Guramasynyň Baş Assambleýasynyň ýörite Rezolýusiýasy bilen her ýylyň 21-nji marty Halkara Nowruz güni diýlip yglan edilipdi. Munuň özi bu senaniň ähmiýetini has-da artdyrdy. Bütin Gündogar halklarynyň Nowruz baýramyny uludan toýlamagynyň aňyrsynda uly many bar. Halklaryň arasyndaky parahatçylygy berkitmekde we adamzady parahatçylyga çagyrmakda bu baýrama uly ähmiýet degişlidir. Nowruz baýramynyň çäklerinde dürli däp-dessurlar berjaý edilýär, aýratyn tagamlar taýýarlanylýar, adamlar biri-biriniňkä maşgala bolup myhmançylyga barýarlar we köpçülikleýin dabaralar guralýar. Türkmen halky Nowruz baýramynda bereketli saçaklaryny has giňden ýazyp, toý gazanlaryny atarýar. Semeni halkymyzyň toý bezegini artdyrýar.
«Pähim-paýhas ummany Magtymguly Pyragy» ýylynyň häzirki nowjuwan baharynda Ahal welaýatynyň Ak bugdaý etrabynyň çägindäki Nowruz ýaýlasy has-da görkana görünýär. Ol ýerde baýramçylyk dabaralary giň gerim alýar. Ahal welaýaty we Aşgabat şäheri tarapyndan guralýan dabaralar bu gözel künjegiň toý keşbine özboluşly öwüşgin berýär.
Rejepgeldi ATAJANOW,
TMÝG-niň Ahal welaýatynyň
Ak bugdaý etrap Geňeşiniň bölüm müdiri.
