Hormatly Prezidentimiziň ‹‹Gündogaryň beýik akyldary we nusgawy şahyry Magtymguly Pyragynyň doglan gününiň 300 ýyllygyny bellemek hakynda›› Kararyna laýyklykda, häzirki wagtda ýurdumyzda dana şahyryň adamzadyň ruhy medeniýetiniň hazynasyna giren ýokary ahlaklylyk, agzybirlik, dost-doganlyk, ynsanperwerlik, zähmetsöýerlik, ruhubelentlik, watançylyk duýgularyny terbiýelemegiň milli mekdebiniň baý edebi mirasyny öwrenmek hem-de dünýä jemgyýetçiligine ýaýmak maksady bilen, toplumlaýyn işler alnyp barylýar.
Şunuň bilen baglylykda, ýurdumyzyň ähli ylym-bilim ojaklarynda hem degişli meýilnamalar esasynda birnäçe wagyz-nesihat çäreleri, duşuşyklar, medeni çäreler yzygiderli gurnalýar.
Şeýle çäreleriň biri-de 2024-nji ýylyň 25-nji martynda Türkmenistanyň Magtymguly adyndaky Ýaşlar guramasynyň Balkanabat şäher Geňeşiniň we TMÝG-niň ‹‹Türkmennebit›› döwlet konserniniň şahamçasynyň bilelikde gurnamagynda Ýagşygeldi Kakaýew adyndaky Halkara nebit we gaz uniwersitetiniň Balkanabat bölüminde geçirildi. Nusgawy edebiýatymyzyň kerwenbaşysy Magtymguly Pyragynyň 300 ýyllygy mynasybetli geçirilen wagyz-nesihat çärede çykyş edenler türkmen halkynyň we dünýäniň ençeme halklarynyň ruhy dünýäsinde uly orun alan Magtymguly Pyragynyň döredijiligi, onuň eserleriniň umumadamzat derejesindäki ähmiýeti, ýaşlara edep-terbiýe bermekde şahyryň şygyrlarynyň uly orny barada giňişleýin gürrüň berdiler.
Çäräniň ahyrynda oňa gatnaşanlar Magtymguly Pyragynyň edebi mirasyny öwrenmäge giň mümkinçilikleri döredýän, milli gymmatlyklarymyzy hormatlap, söz sungatynyň ägirtleriniň sarpasyny belent tutýan Türkmen halkynyň Milli Lideri Gahryman Arkadagymyzyň we hormatly Prezidentimiz Arkadagly Gahryman Serdarymyzyň janlarynyň sag, ömürleriniň uzak, başlarynyň dik bolmagyny, il-ýurt bähbitli, umumadamzat ähmiýetli tutýan tutumly işleriniň nurana ýollarda hemişe rowaçlyklara beslenmegini arzuw etdiler.
Baýramgül ESENOWA,
TMÝG-niň Balkanabat şäher Geňeşiniň
guramaçylyk bölüminiň esasy hünärmeni.
