Ýakynda Ahal welaýatynyň merkezindäki Medeniýet öýünde welaýat häkimliginiň, Türkmenistanyň Magtymguly adyndaky Ýaşlar guramasynyň welaýat Geňeşiniň, welaýatyň beýleki jemgyýetçilik guramalarynyň hem-de Medeniýet müdirliginiň bilelikde guramagynda geçirilen hoşallyk maslahaty Änew şäheriniň 2024-nji ýylda «Türki dünýäsiniň medeni paýtagty» diýlip yglan edilmegi mynasybetli çärelere badalga bermek dabarasynyň üstünlikli geçirilmegine bagyşlandy.
Maslahata welaýatyň ähli etraplaryndan dürli kärdäki we ýaşdaky raýatlar, şol sanda bagtyýar ýaşlar gatnaşmak bilen, täsirli çykyşlary uly gyzyklanma bilen diňlediler. Çykyşlarda Änew şäheriniň 2024-nji ýylda «Türki dünýäsiniň medeni paýtagty» diýlip yglan edilmegi mynasybetli çärelere badalga bermek dabarasynyň Ak bugdaý etrabynyň Nowruz ýaýlasyndaky «Türkmeniň ak öýi» binasynda ýokary guramaçylyk derejesinde geçirilmegi, oňa türki dilli döwletlerden we halkara guramalaryndan wekilleriň gatnaşmagy buýsançly we şatlykly waka, dost-doganlygyň dabaralanmasyna öwrülendigi buýsanç bilen bellenip geçildi.
Maslahata gatnaşanlar Änew şäherinde «Gadymy Änew medeniýeti» ady bilen geçirilen halkara ylmy maslahatyň taryhy ähmiýeti barada hem gürrüň etdiler hem-de «Pähim-paýhas ummany Magtymguly Pyragy» ýylynyň şatlykly günlerinde ýaýbaňlandyrylan çäreleriň ýokary guramaçylykly geçmegine taýsyz tagallalary edýän Arkadagly Gahryman Serdarymyzyň adyna hoşallyk we alkyş sözlerini aýtdylar.
Dabaranyň dowamynda welaýatyň medeniýet we sungat ussatlarynyň ýerine ýetirmeginde ýaňlanan aýdym-sazlarda, tans-halk döredijilik çykyşlarynda beýik döwrümiziň buýsançly waspy joşgunly beýan edildi.
Annamuhammet GULOW,
TMÝG-niň Ahal welaýat Geňeşiniň bölüm müdiri.
