Türkmenistanyň dzýudo boýunça milli ýygyndysy şu günler Türkiýe Respublikasynyň Antalýa şäherinde okuw-türgenleşik ýygnanyşygyny alyp barýar. Bu ýerde iki tälimçiden we sekiz türgenden ybarat ýygyndy şu aýyň 20 ― 23-i aralygynda Gonkongda geçiriljek Aziýanyň çempionatyna taýýarlanýar.
Ýakynda türkmen dzýudoçylarynyň Türkiýede «Grand Slam Antalya 2024» halkara ýaryşyna gatnaşyp, onda Maýda Pardaýewanyň 57 kilograma çenli agram derejesinde bürünç medala eýe bolandygyny habar beripdik. Türkmen dzýudoçylarynyň bu ýaryşyň geçirilen şäherindäki türgenleşikleri 10-njy aprele çenli dowam eder.
Gonkongdaky Aziýa çempionatyndan soňra olar 23 — 30-njy aprel aralygynda Gazagystan Respublikasynyň Tolebiý etrabynyň Akbastau obasynda hem okuw-türgenleşik ýygnanyşygyny geçer. Oňa topar ýolbaşçysyndan, psihologdan, lukmandan hem-de tälimçiler düzüminden başga-da türgenleriň 14-si gatnaşar.
Bu türgenleşik çäreleri ýygyndy toparymyzyň dörtýyllygyň iň uly sport baýramyna — tomusky Olimpiýa oýunlaryna ýokary taýýarlykly barmagyny gazanmak ugrundaky ädimleriň möhüm tapgyryny emele getirer.
turkmenportal.com
04.04.2024ý.
