Daşoguz welaýatynyň Boldumsaz etrap tapgyry
Golaýda Daşoguz welaýatynyň Boldumsaz etrabynyň Gubadag şäher medeniýet merkezinde Türkmenistanyň Prezidentiniň «Türkmeniň Altyn asyry» atly baýragyny almak ugrundaky bäsleşigiň çäklerinde, ýaş bagşy-sazandalaryň arasynda yglan edilen «Çalsana, bagşy!» atly bäsleşigiň etrap tapgyry geçirildi. Bäsleşige etrabyň oba medeniýet öýleriniň, medeniýet merkezleriniň çeper höwesjeň bagşy-sazandalarynyň jemi 17 sanysy gatnaşdy. Bäsleşigiň şertlerine laýyklykda, höwesjeň aýdymçylar Gahryman Arkadagymyzy, Arkadagly Gahryman Serdarymyzy, ata Watanymyzyň gazanan üstünliklerini, ýeten belent sepgitlerini wasp etdiler. Olaryň ýerine ýetiren aýdymlary bäsleşige tomaşa etmäge gelenleriň göwünlerini galkyndyrdy. Bäsleşikde ýaş bagşylaryň, sazandalaryň eden çykyşlary biri-birinden has-da tapawutly boldy.
Eminler toparynyň gelen netijelerine laýyklykda, Gökýaýla geňeşligindäki Ak altyn oba medeniýet öýüniň çeper höwesjeňi Şatlyk Tüýliýew, Abadanlyk geňeşligindäki Abadanlyk oba medeniýet öýüniň çeper höwesjeňi Göwher Haýydowa, Jeýhun geňeşligindäki Gatyoý oba medeniýet öýüniň çeper höwesjeňi Pälwan Tagyýew, Gurbandurdy bagşy adyndaky çagalar sungat mekdebiniň bagşy mugallymy Ylham Sopyýew, Gubadag şäher medeniýet merkeziniň çeper höwesjeňi Berdimyrat Ballyýew, Aşgabat geňeşligindäki Çigoý oba medeniýet öýüniň çeper höwesjeňi Rahat Saparow, Gubadag geňeşligindäki Weliýap oba medeniýet öýüniň çeper höwesjeňi Amanberdi Amanow dagylar bäsleşigiň etrap tapgyrynyň ýeňijileri diýlip yglan edildiler hem-de onuň welaýat tapgyryna gatnaşmaga hukuk gazandylar. Bäsleşige gatnaşyjylara Türkmenistanyň Magtymguly adyndaky Ýaşlar guramasynyň Boldumsaz etrap Geňeşiniň etrap medeniýet bölümi bilen bilelikdäki Hormat hatlary hem-de Ýaşlar guramasynyň ýadygärlik sowgatlary dabaraly ýagdaýda gowşuryldy.
Nurjemal SAPAROWA,
TMÝG-niň Daşoguz welaýatynyň
Boldumsaz etrap Geňeşiniň uly buhgalteri.
