Golaýda Türkmenistanyň Magtymguly adyndaky Ýaşlar guramasynyň Daşoguz welaýatynyň Boldumsaz etrap Geňeşi, etrabyň Gubadag şäher medeniýet merkeziniň, etrabyň Gubadag şäher kitaphanasynyň işgärleriniň gatnaşmagynda, «Ady dünýä dolan saýrak dutarym» atly şygar astynda aýdym-sazly söhbetdeşlik çäresini geçirdi. Söhbetdeşlikde Gubadag şäher medeniýet merkeziniň usulyýetçisi Yhlas Aşyrow, Gubadag şäher medeniýet merkeziniň folklýor režissýory Ogultäç Saparowa, etrabyň Gubadag şäher çagalar sungat mekdebiniň mugallymlary, bagşylar Gadam Gazakow, Meýlis Ilbaýew, etrabyň Gubadag şäher merkezi kitaphanasynyň kitaphanaçysy Mähriban Seýliýewa dagylar çykyş etdiler. Olar özleriniň çykyşlarynda Berkarar döwletiň täze eýýamynyň Galkynyşy döwründe Arkadagly Gahryman Serdarymyzyň parasatly ýolbaşçylygynda, milli medeniýetimiziň, sungatymyzyň uly ösüşlere eýe bolandygyny, bedew bady bilen öňe barýan berkarar döwletimiziň durmuşyndaky şatlykly wakalaryň bagtyýar halkymyzy täze ýeňişlere, belent maksatlara ruhlandyrýandygyny, häzirki döwürde ýurdumyzy ähli ugurlar boýunça düýpli ösdürmek, halkymyzyň bagtyýar, abadan durmuşyny üpjün etmek, mähriban Watanymyzyň halkara abraýyny belende götermek ugrunda giň gerimli işleriň amala aşyrylýandygyny, türkmen topragynyň gadymy döwürlerden bäri senetçiligiň, ussaçylygyň we sungatyň mekanydygyny, halkymyzyň dutarda saz çalmak we bagşyçylyk sungatynyň dünýä gymmatlyklarynyň genji-hazynasynda orun alandygyny uly buýsanç bilen belläp geçdiler.
Aýdym-sazly duşuşygyň dowamynda Gubadag şäher çagalar sungat mekdebiniň mugallymlary, bagşylar Gadam Gazakow we Meýlis Ilbaýew dagylaryň ýerine ýetirmeginde diňlenen türkmen halkynyň Milli Lideri Gahryman Arkadagymyzy, Arkadagly Gahryman Serdarymyzy, mähriban halkymyzy wasp edýän ajaýyp aýdymlar çärä özboluşly bezeg berdi.
Duşuşyga gatnaşanlar medeniýetimiziň, sungatymyzyň kämilleşmegi we dünýä derejesinde dabaralanmagy üçin giň ýol açýan türkmen halkynyň Milli Lideri Gahryman Arkadagymyza hem-de hormatly Prezidentimiz Arkadagly Gahryman Serdarymyza ýüreklerden çykýan alkyş sözlerini beýan etdiler.
Parahat SABYROW,
TMÝG-niň Daşoguz welaýatynyň
Boldumsaz etrap Geňeşiniň esasy hünärmeni.
