Golaýda Daşoguz şäheriniň «Ýaşlar» merkezinde hormatly Prezidentimiziň «Türkmeniň Altyn asyry» atly baýragyny almak ugrundaky bäsleşigiň çäklerinde, ýaş dutarçy bagşy-sazandalaryň arasynda yglan edilen «Çalsana, bagşy!» atly bäsleşiginiň Daşoguz welaýatynyň Daşoguz şäher tapgyry geçirildi.
Bäsleşige çeper höwesjeň ýaş bagşy-sazandalaryň jemi 8 sanysy gatnaşdylar. Bäsleşikde çykyş eden ýaş zehinler Türkmen halkynyň Milli Lideri Gahryman Arkadagymyzy, Arkadagly Gahryman Serdarymyzy, mähriban halkymyzy, eziz Watanymyzy wasp edýän türkmen halk aýdymlaryny, halk sazlaryny ussatlyk bilen ýerine ýetirdiler.
Emin agzalarynyň gelen netijelerine laýyklykda, Daşoguzyň M.Garlyýew adyndaky ýörite sungat mekdebiniň talyplary Bezirgen Kakaýew «Hajygolak» atly halk sazyny, Nurana Arazgeldiýewa «Kiçi» atly halk sazyny, Sahy Täçmedow «Ýandym, Leýli» atly halk sazyny, Gurbanbibi Hudaýberdiýewa «Düşmüş» atly halk sazyny, Daşoguz şäheriniň 2-nji çagalar sungat mekdebiniň mugallymlary Pirli Babaýew «Gökdepe mukamy» atly halk sazyny, Gunça Täjibaýewa «Dön göwnüm» atly halk sazyny, Türkmen oba hojalyk institutynyň talyby Nazarmät Tirkişmädow «Bolmasa» atly halk aýdymyny, Maýa Kulyýewa adyndaky Türkmen milli konserwatoriýasynyň talyby Dünýägözel Gutlyýewa «Düşmüş» atly halk aýdymyny ussatlyk bilen ýerine ýetirdiler. Olar bäsleşigiň bu tapgyrynyň ýeňijileri diýlip yglan edildi.
Şeýlelikde, ýeňijiler bäsleşigiň welaýat tapgyryna gatnaşmaga hukuk gazandylar. Bäsleşige gatnaşan bagşy-sazandalara jemgyýetçilik guramalarynyň ýadygärlik sowgatlary hem-de TMÝG-niň ýerli Geňeşiniň Hormat hatlary gowşuryldy.
Çynar MÄMEDOWA,
TMÝG-niň Daşoguz welaýatynyň
Daşoguz şäher Geňeşiniň bölüm müdiri.
