Golaýda Daşoguz welaýatynyň Görogly etrabynyň daşary ýurt dillerine ýöriteleşdirilen 65-nji orta mekdebinde etrabyň orta mekdepleriniň 6 – 11-nji synp okuwçylarynyň arasynda «Zehinimiz Watana» atly ýaş oýlap tapyjylaryň arasynda sergi bäsleşigini guraldy. Ýaş oýlap tapyjylyk işi bilen meşgullanýan zehinli, aýratyn ukyp-başarnykly, döredijilikli mekdep okuwçylaryny tapawutlandyrmak we höweslendirmek maksady bilen geçirilen çärä etrabymyzdan 40-a golaý okuwçy gatnaşdy. Etrabyň bilim bölümi bilen Ýaşlar guramasynyň ýerli Geňeşiniň bilelikde guramagynda geçirilen sergi bäsleşiginde mekdep okuwçylary mugallymlarynyň ýolbaşçylygynda oýlap tapan dürli görnüşli enjamlaryny, kompýuter programmalaryny, täze önümçilikleriň maketlerini we beýlekileri görkezdiler.
Mekdep okuwçylarynyň sergi bäsleşigine hödürlän işleri köplerde uly gyzyklanma döretdi. Netije-de, 19-njy orta mekdebiň 9-njy synp okuwçylary Gülşen Zahyrowa bilen Gülnäz Zahyrowanyň «Tam ýuwujy enjam» atly işi 1-nji orna, 57-nji orta mekdebiň 11-nji synp okuwçysy Suraý Aşyrowanyň «Gaz keşlerinde näsazlyk ýüze çykanda habar beriji enjam» atly işi 2-nji orna, daşary ýurt dillerine ýöriteleşdirilen 50-nji orta mekdebiň 11-nji synp okuwçysy Begenç Begjanowyň «Klawiaturada türgenleşik» diýen işi 3-nji orna mynasyp bolup, olar çäräni gurnaýjylar tarapyndan Hormat hatlary bilen sylaglandylar.
Altyn ATAKOWA,
TMÝG-niň Daşoguz welaýatynyň
Görogly etrap Geňeşiniň bölüm müdiri.
