«Magtymguly – geçmişimiz, şu günümiz we geljegimizdir» atly ylmy-amaly maslahatyň açylyş dabarasyndan soňra maslahatyň «Gahryman Arkadagymyzyň eserlerinde akyldar şahyryň edebi keşbi» atly 1-nji bölümçesi öz işini Balkan welaýatynyň Magtymguly etrabyndaky “Magtymguly Pyragy” muzeýiniň mejlisler jaýynda dowam etdi.
Maslahata Türkmenistanyň Mejlisiniň deputatlary, Ýaşlar guramasynyň dürli ulgamlarda zähmet çekýän agzalary, ylym we bilim işgärleri, halypa ýazyjy-şahyrlar, köpçülikleýin habar beriş serişdeleriniň wekilleri hem-de ýaş alymlar, döredijilige höwesjeň ýaşlar işjeň gatnaşdylar.
Ylmy-amaly maslahatyň 1-nji bölümçesini Türkmenistanyň Ylymlar akademiýasynyň Magtymguly adyndaky Dil, edebiýat we milli golýazmalar institutynyň ylmy işgäri, Türkmenistanyň Prezidentiniň ýanyndaky döwlet gullugy akademiýasynyň diňleýjisi M.Meredow alyp bardy.
Bölümçäniň dowamynda Türkmenistanyň Mejlisiniň deputaty, Mejlisiň Kada-kanunçylyk baradaky komitetiniň agzasy M.Geldimämmedow, Türkmenistanyň Senagatçylar we telekeçiler partiýasynyň Arkadag şäheriniň komitetiniň başlygy A.Täşliýew, Myrat Garryýew adyndaky Türkmenistanyň Döwlet lukmançylyk uniwersitetiniň mugallymy M.Nurlyýewa, «Türkmenistan» gazetiniň öz habarçysy B.Baýhanow, Magtymguly adyndaky Türkmen döwlet uniwersitetiniň dünýä taryhy kafedrasynyň mugallymy J.Öwezowa, Türkmenistanyň Döwlet energetika institutynyň talyby O.Ataýewa, şeýle-de, Türkmen döwlet medeniýet institutynyň 5-nji ýyl talyby Ý.Allanazarow dagy çykyş etdiler.
Bu bölümçede çykyş edenler Magtymgulynyň golýazmalary dünýäniň hakydasynda, Magtymgulyň dilleriniň senasy, Gahryman Arkadagymyzyň eserlerinde akyldar şahyrymyzyň çeper beýany, Gahryman Arkadagymyzyň eserlerinde Magtymgulynyň mertlik pelsepesi, Gahryman Arkadagymyzyň döredijiliginde Magtymguly Pyragynyň çeper keşbi, Şahyryň döredijiliginde taryhy şahslaryň keşbi, Gahryman Arkadagymyzyň ylhamynda Magtymguly Pyragy, Magtymguly Pyragy – paýhasyň şamçyragy ýaly temalar boýunça gürrüň berdiler.
Türkmen halkynyň Milli Lideri Gahryman Arkadagymyzyň eserlerinde Magtymguly Pyragynyň ajaýyp goşgy setirleri mysal hökmünde getirilýär we beýik şahyrymyzyň döredijiligine goýulýan bimöçber sarpa aýdyň şöhlelenýär. Bu eserlerde döwürler dolanyp, heňňamlar öwrülse-de, öz gymmatyny ýitirmän gelýän Magtymguly Pyragynyň döredijiligine örän ýokary baha berilýär. Gahryman Arkadagymyzyň beýik söz ussadynyň döredijiligine, edebi mirasyna aýratyn ähmiýet bermegi bolsa, has-da guwandyrýar. Gahryman Arkadagymyzyň taýsyz-tagallalary bilen geçen ýyllaryň dowamynda şahyryň gymmatly edebi we pelsepewi mirasyny giňden wagyz etmek babatda köp işler alnyp baryldy, beýik akyldaryň eserleri dünýäniň dürli dillerine terjime edildi. Çykyş edenler şular dogrusynda giňişleýin beýan etdiler.
.jpg)
.jpg)
