Kaka etrabynyň umumybilim berýän mekdeplerinde «Soňky jaň» dabaralary Türkmenistanyň Magtymguly adyndaky Ýaşlar guramasynyň, etrap häkimliginiň, bilim bölüminiň, beýleki jemgyýetçilik guramalarynyň bilelikdäki tagallasy netijesinde ýokary guramaçylyk derejesinde geçirildi. «Pähim-paýhas ummany Magtymguly Pyragy» ýyly şygary astynda geçýän şanly ýylymyzda etrap boýunça ýaşlaryň 1171-sine mekdep uçurymy bolmak bagty miýesser etdi.
«Soňky jaň» dabaralary mekdep uçurymlaryna şatlykly pursatlary bagyş etdi.
Baýramçylyk dabaralarynda hormatly Prezidentimiziň ýurdumyzyň orta mekdepleriniň uçurymlaryna, mugallymlaryna we ähli bilim işgärlerine Gutlagynyň okalmagy bilen başlandy. Dabaralara gatnaşan myhmanlar öz çykyşlarynda orta mekdebi tamamlaýan uçurymlary ajaýyp waka mynasybetli gutladylar hem-de durmuşda ak ýol arzuw etdiler.
Ýaňlanan joşgunly mukamlardyr şirin aýdymlarda Watanymyzyň ösüşleriniň, halkymyzyň eşretli, bolelin ýaşaýşynyň, bagtly ýaşlygyň, dost-doganlygyň waspy belentden ýetirildi. Dabaralaryň dowamynda okuw ýylyny oňat bahalar bilen jemlän okuwçy ýaşlar sylaglandy.
Begenç ÖWEZOW,
TMÝG-niň Ahal welaýatynyň Kaka etrap Geňeşiniň başlygy.
