Ýaňy-ýakynda şeýle şygar astynda, Türkmenistanyň Magtymguly adyndaky Ýaşlar guramasynyň Daşoguz welaýatynyň Görogly etrap Geňeşi ÝUNESKO-nyň maddy däl medeni gymmatlyklarymyzyň sanawyndan orun alan dutar ýasamak, saz çalmak, bagşyçylyk sungatymyzy ösdürmek, bu gadymy sungaty ýaşlara öwretmek maksady bilen, etrabyň medeniýet merkezinde aýdym-sazly söhbetdeşlik çäresini geçirdi. Oňa etrabymyzyň il sylagly ýaşululary, mährem eneler, etrap häkimliginiň we jemgyýetçilik guramalarynyň wekilleri, bilim we medeniýet ulgamlarynda zähmet çekýän ýaşlar gatnaşdylar.
Aýdym-sazly söhbetdeşlik çäresinde çykyş edenler türkmeniň bagşyçylyk sungatynyň we dutar ýasamak senetçiliginiň öz gözbaşyny irki döwürlerden alyp gaýdýandygyny, halkymyzyň ýokary ahlak, watansöýüjilik häsiýetleriniň milli bagşyçylyk sungatynda jemlenendigini buýsanç bilen belläp, hormatly Prezidentimiziň medeni mirasymyzyň gymmatlyklaryna berýän ünsi, goýýan sarpasy hakda gürrüň berdiler. Çykyşlarda dutar ýasamak senetçiliginiň, dutarda saz çalmak we bagşyçylyk sungatynyň ÝUNESKO-nyň Adamzadyň maddy däl medeni mirasynyň sanawyna girizilmegi bilen baglanyşykly buýsançly gürrüňler edildi. Çykyşlarda nygtalyşy ýaly, bu waka türkmen halkynyň Milli Lideri Gahryman Arkadagymyzyň, Arkadagly Gahryman Serdarymyzyň milli medeniýetimiziň, aýdym-saz sungatymyzyň ösmegi we dünýä ýaýylmagy ugrunda edýän taýsyz tagallalarynyň subutnamasy bolup durýar.
Soňra etrabyň çagalar sungat mekdebiniň okuwçylaryndan düzülen dutarçylar toparynyň ýerine ýetiren çykyşlary bolsa, türkmeniň bagşyçylyk sungatynyň ösüşine goşant goşjak geljekki ussat bagşydyr sazandalaryň kemala gelýändigini dabaralandyrdy. Şoňa görä-de, etrabymyzyň bagşy-sazandalarynyň bu ýerdäki joşgunly konserti ýakymly duýgular bilen ýatda galdy.
Çärä gatnaşyjylar medeni mirasymyza aýratyn ähmiýet berýändigi, milli aýdym-saz sungatymyzyň ösmegine uly tagallalar edýändigi üçin halkymyzyň Milli Lideri Gahryman Arkadagymyza hem-de Arkadagly Gahryman Serdarymyza ýüreklerden çykýan alkyşlarynywe hoşallyklaryny beýan etdiler.
Altyn ATAKOWA,
TMÝG-niň Daşoguz welaýatynyň
Görogly etrap Geňeşiniň bölüm müdiri.
