Türkmenistanyň Magtymguly adyndaky Ýaşlar guramasynyň Ahal welaýatynyň Kaka etrap Geňeşiniň guramagynda etrabyň Hywaabat jülgesinde ýerleşýän «Ýaşyl ýaýla» çagalar dynç alyş-sagaldyş merkezinde «Biz şadyýan nesiller» ady bilen kiçi futbol boýunça ýaryş geçirildi.
Ýaryşyň açylyş dabarasynda bagtyýar çagalara sport bilen yzygiderli meşgullanmak we sagdyn durmuş ýörelgelerine eýermek boýunça gymmatly ündewler aýdyldy hem-de üstünlik arzuw edildi. Bu bolsa çagalaryň ýeňiş gazanmaga bolan hyjuwyny artdyryp, ruhuny belende göterdi.
Merkeziň futbol meýdançasynda giň gerim alan ýaryş gyzykly duşuşyklara baý boldy. Merkezde dynç alyp, saglygyny berkidýän çagalardan düzülen toparlar özaralarynda bäsleşip, ukyp-başarnygyny görkezdiler. Netijede “Bagtyýarlyk” topary ýaryşyň ýeňijisi boldy. Ýeňiji bolan topara Türkmenistanyň Magtymguly adyndaky Ýaşlar guramasynyň etrap Geňeşiniň ýadygärlik sowgatlary gowşuryldy.
Begli MÄMMEDOW,
TMÝG-niň Ahal welaýatynyň Kaka etrap
Geňeşiniň guramaçylyk bölüminiň müdiri.
