Galla oragynyň gyzgalaňly dowam edýän häzirki günlerde Türkmenistanyň Magtymguly adyndaky Ýaşlar guramasynyň Ahal welaýatynyň Ak bugdaý etrap Geňeşi tarapyndan zähmetkeşleriň armasyny ýetirmekde we öňdebaryjylary höweslendirmekde mynasyp tagalla edilýär. Etrabyň Magtymguly adyndaky daýhan birleşiginiň meýdan düşelgesinde günorta çagynda, gysga wagtlyk arakesme wagtynda guralan medeni-dynç alyş dabarasy hem munuň aýdyň subutnamasydyr.
Türkmenistanyň Magtymguly adyndaky Ýaşlar guramasynyň Ak bugdaý etrap Geňeşiniň, etrap häkimliginiň, beýleki jemgyýetçilik guramalarynyň hem-de etrap medeniýet bölüminiň bilelikde guramagynda geçen dabarada gallaçylara ýurt Garaşsyzlygymyzyň şanly 33 ýyllygyny zähmet üstünliklere beslemekleri, guşgursak ak bugdaýy öz wagtynda ýygnap, ammarlara tabşyrmagy arzuw edildi.
Etrabyň medeniýet-sungat işgärleriniň, tans toparynyň çykyşlary ol ýere ýygnanan gallaçy-kärendeçileriň, kombaýnçylaryň we dänäni harmana daşaýjy awtoulag sürüjileriniň göwünlerini galkyndyryp, ajaýyp zähmet üstünliklerine joşgun berdi. Sungat çykyşlarynda bagtyýar zamanamyzyň, mähriban Diýarymyzyň, zähmetkeş adamlarynyň waspy öz joşgunly beýanyny tapdy.
Dabaranyň dowamynda öňdebaryjy gallaçylara etrabyň jemgyýetçilik guramalarynyň ýörite sowgatlary gowşuryldy.
Rejepgeldi ATAJANOW,
TMÝG-niň Ahal welaýatynyň Ak bugdaý etrap
Geňeşiniň guramaçylyk bölüminiň müdiri.
