Türkmen halkynda «Gallam bar – tyllam bar» diýen paýhasly jümläniň bardygyny hemmämiz bilýäris. Bu jümle gallanyň ynsan durmuşyndaky ähmiýetini açyp görkeýär. Çünki galla azyk bolçulygynyň, rysgal-berekediň gözbaşy.
Edermen gallaçylarymyzyň yhlasly zähmeti netijesinde ýurdummyzda ýylyň-ýylyna guşgursak ak bugdaýyň ýokary hasyly ýetişdirilýär. «Pähim-paýhas ummany Magtymguly Pyragy» ýylynda gyzgalaňly dowam edýän galla oragy şanly ýylymyzda hem sahawatly türkmen topragynda dänäniň bol hasylynyň ýetişdirilendigini subut edýär.
Gahryman Arkadagymyzyň ajaýyp başlangyçlary, Arkadagly Gahryman Serdarymyzyň taýsyz tagallalary esasynda oba hojalygynda amala aşyrylýan giň gerimli özgertmeler milli ykdysadyýetimiziň agrosenagat pudagyny hil taýdan täze sepgitlere çykarýar. Dünýäniň häzirki zaman ýokary öndürijilikli oba hojalyk tehnikalarynyň yzygiderli satyn alynmagy möwsümleýin meýdan işlerini göwnejaý alyp barmakda, şol sanda ak bugdaýyň bereketli hasylyny ýygnamakda möhüm ähmiýete eýe bolup durýar. Bu hakykata häzirki günlerde bereketli meýdanlarda kuwwatly däne orujy kombaýnlaryň sazlaşykly hereketi aýdyňlygy bilen görkezýär. Galla oragynyň depginli alnyp barylmagynda kombaýnlara möhüm orun degişlidir. Bu zatlar oba hojalyk pudagynda täze sepgitlere ýetilmegini we edermen daýhanlaryň çekýän zähmetiniň ýerine düşmegini şertlendirýär, ýurdumyzda azyk bolçulygyny pugtalandyrmak işini üstünlikli çözmäge mümkinçilik berýär.
Döredilen şeýle şertlerden ruhlanyp, Ahal welaýatynyň Bäherden etrabynyň edermen gallaçylary häzirki jogapkärli möwsümi üstünlikli tamamlap, ýurdumyzyň galla harmanyna öz saldamly goşantlaryny goşmak üçin irginsiz zähmet çekýärler. Biz – Türkmenistanyň Magtymgulu adyndaky Ýaşlar guramasynyň etrap Geňeşiniň işgärleri bolsa, oba hojalygyndaky gyzgalaňly günlerde gallaçylaryň armasyny ýetirip, höweslendiriş işlerimiz bilen oba zähmetkeşleriniň zähmet üstünligine ruhlandyrýarys.
Seýdylla ÝAZMÄMMEDOW,
TMÝG-niň Ahal welaýatynyň Bäherden etrap
Geňeşiniň guramaçylyk bölüminiň sanly
ulgam boýunça esasy hünärmeni.
