Ýaňy-ýakynda Türkmenistanyň Magtymguly adyndaky Ýaşlar guramasynyň Daşoguz welaýatynyň Daşoguz şäher Geňeşi, hormatly Prezidentimiziň ýaşlaryň arasynda sporty we köpçülikleýin bedenterbiýäni giňden ösdürmek, jemgyýetimizde sagdyn durmuş ýörelgelerini wagyz etmek hem-de ornaşdyrmak, beden taýdan berk, sagdyn, ruhubelent nesli terbiýeläp ýetişdirmek baradaky aladalaryndan ugur alyp, «Bagtyýar nesil» çagalar sagaldyş we dynç alyş merkezinde dynç alýan çagalaryň gatnaşmaklarynda «Sport – bagtyýar geljegiň binýady» atly şygary astynda sportuň kiçi futbol hem-de ýeňil atletika görnüşleri boýunça bäsleşikleri geçirdi. Olara çagalar uly höwes bilen gatnaşdylar. Ýaryşlarda sportuň adama sagdynlyk hem ruhubelentlik bagyşlaýandygy, öz güýjüňe hem başarnygyňa ynamy artdyrýandygy, umuman, sporty hemra edinmekligiň durmuşyňy gözelleşdirýändigi mese-mälim duýuldy.
Kiçi futbol ýaryşynda «Ruhubelent» hem-de «Güneş» toparlary özara bäsleşdiler. bäsleşikde 1-nji orna «Güneş» topary mynasyp boldy.
Ýeňil atletikanyň 100 metre ylgamak ugry boýunça geçirilen bäsleşik hem gyzgalaňly boldy.
Bäsleşigiň ýeňijilerine Ýaşlar guramasynyň ýerli Geňeşiniň adyndan ýadygärlik sowgatlar gowşuryldy.
Jennet GULMYRADOWA,
TMÝG-niň Daşoguz welaýatynyň
Daşoguz şäher Geňeşiniň esasy hünärmeni.
