Ahal welaýatynyň Bäherden etrabynyň çägi gözelliklere we täsinliklere baýdyr. «Arçman», «Ýyly suw» şypahanalary, «Köw ata» ýerasty köli hem etrabyň uly meşhurlyga eýe bolan ýerleridir. Türkmenistanyň Magtymguly adyndaky Ýaşlar guramasynyň Bäherden etrap Geňeşi tarapyndan etrabyň ýaşlarynyň arasynda yzygiderli geçirilýän wagyz-nesihat işlerinde melheme baý şol ajaýyp ýerler barada täsirli gürrüň açylýar. «Köw ata» ýerasty köli boýunça syýahat hem guralýar.
Gahryman Arkadagymyzyň ýakynda, zähmet rugsady wagtynda etrabymyzdaky meşhur «Arçman» şypahanasyna gelip, Halk Maslahatynyň nobatdaky mejlisine, Watanymyzyň durmuşynda möhüm orun eýeleýän şanly senelere görülýän taýýarlyk işleriniň barşy bilen gyzyklanmagy, şeýle-de agtyjaklary hem-de çowlugy bilen şypahananyň çägi boýunça gezelenç etmegi hemmelerde, şol sanda etrabymyzyň ýaşlarynda buýsanç duýgusyny döretdi.
Şu günler edara-kärhanalarda, geňeşliklerde guralýan wagyz-nesihat duşuşyklarda şol taryhy wakanyň ähmiýeti dogrusynda buýsançly söhbet açylýar. Wagyz-nesihat çärelerimiziň barşynda Arkadagly Gahryman Serdarymyzyň, Gahryman Arkadagymyzyň taýsyz tagallalary bilen bu günü «Arçman» şypahanasynyň täze binasynyň gurluşygynyň, şeýle-de ozalky binanyň durkuny döwrebaplaşdyrmak işleriniň güýçli depginde alnyp barylmagy barada hem gürrüň berýäris. Bu zatlar üçin hormatly Prezidentimize we Gahryman Arkadagymyza buýsanjymyz çäksizdir.
Sahabatberdi KÖSÄÝEW,
TMÝG-niň Ahal welaýatynyň Bäherden
etrap Geňeşiniň esasy hünärmeni.
