Änew şäherindäki «Bagt ýyldyzy» toý mekanynda Türkmenistanyň Magtymguly adyndaky Ýaşlar guramasynyň Ahal welaýatynyň Ak bugdaý etrap Geňeşiniň, etrap häkimliginiň we beýleki jemgyýetçilik guramalarynyň bilelikde guramagynda şanly Garaşsyzlygymyzyň 33 ýyllygyna bagyşlanan aýdym-sazly dabara geçirildi.
Etrabymyzyň edara-kärhanalarynda, jemgyýetçilik guramalarynda zähmet çekýän ýaşlaryň uly hyjuw bilen gatnaşmagynda geçen dabarada baýramçylyk gutlaglary aýdyldy. Bereketli toý suprasynyň başyna ýygnananlar Garaşsyz Watanymyzyň ösüşleri, hormatly Prezidentimiziň parasatly baştutanlygynda milli ykdysadyýetimiziň dürli ugurlarynda gazanylýan üstünlikler, eşretli döwrümiziň gadyr-gymmaty dogrusynda söhbet açdylar.
Baýramçylyk dabarasynyň dowamynda etrabymyzyň medeniýet bölüminiň aýdym-saz, halk döredijilik toparlarynyň joşgunly çykyşlaryna giň gerim berilmegi hemmelere keýpiçaglyk eçildi. Joşgunly sungat çykyşlary gyzgyn garşylandy.
Maýsa MYRADOWA,
TMÝG-niň Ahal welaýatynyň
Ak bugdaý etrap Geňeşiniň işgäri.
