29-njy iýundan 20-nji iýul aralygynda Ýagşygeldi Kakaýew adyndaky Halkara nebit we gaz uniwersitetiniň talyplary Pekinde Hytaýyň nebit uniwersitetinde okuw-önümçilik tejribeligini geçýärler.
Bu çäre Türkmenistanyň nebitgaz toplumy üçin ýokary derejeli hünärmenleri taýýarlamak, Hytaýyň nebit uniwersitetiniň hem-de Hytaýyň milli nebitgaz korporasiýasynyň (CNPC) işleri bilen tanyşmak we tejribelerini öwrenmek maksady bilen guraldy.
Hytaýyň nebit uniwersiteti türkmen talyplarynyň üç hepdelik okuwy we önümçilik tejribeligi üçin ýörite maksatnama taýýarlady. Onuň çäklerinde ýurdumyzyň talyplary Hytaýyň nebitçilik ýokary okuw mekdebi, onuň barlaghanalary, okuw merkezleri hem-de muzeýleri bilen içgin tanyşýarlar. Tejribelikleriniň dowamynda olar Hytaýyň milli nebitgaz korporasiýasyna hem-de onuň önümçilik desgalaryna baryp görerler.
Talyplar «Hytaý diliniň esaslary», «Hytaý medeniýeti», «Ýaşyl energetika, uglerodyň bölünip çykmasynyň azaldylmagy», «Nebitiň we gazyň geljegi», «Ýüpek ýolunda energetika hyzmatdaşlygynyň geljegi» diýen ugurlar boýunça gysga möhletli okuwlara gatnaşýarlar. Okuwlar Hytaýyň nebit uniwersitetiniň esasy professorlarynyň ýolbaşçylygynda geçirilýär.
Şeýle hem türkmenistanly myhmanlar üçin Hytaýyň geologiýa muzeýine, Hytaýyň ylym we tehnologiýalar muzeýine hem-de Beýik Hytaý diwaryna gezelençler guralar.
Dostlukly Hytaýda alnan nazary bilimler, hünär başarnyklary we önümçilik tejribeler ýurdumyzyň nebitgaz pudagy üçin geljekki hünärmenleri kemala getirmek işinde uly ähmiýete eýe bolar.
Türkmen talyplarynyň okuw geçmekleri 2023-nji ýylda Ýagşygeldi Kakaýew adyndaky Halkara nebit we gaz uniwersiteti bilen Hytaýyň milli nebitgaz korporasiýasynyň (CNPC) hem-de Hytaýyň nebit uniwersitetiniň (Pekin) arasynda gol çekilen özara düşünişmek hakyndaky Ähtnamanyň esasynda geçýär.
Bu resminamalaryň esasynda Hytaýda türkmen talyplary üçin okuwlar yzygiderli guralýar. Taraplaryň arasynda işjeň we netijeli gatnaşyklar ýola goýlup, şonuň çäklerinde ylym-bilim häsiýetli dürli çäreler geçirilýär.
Şu ýylyň iýun-iýul aýlarynda türkmen ýokary okuw mekdebiniň talyplarynyň ikinji topary tomusky önümçilik tejribeliklerini geçmekleri üçin Hytaýyň milli nebitgaz korporasiýasynyň Türkmenistandaky «International Ltd» şahamçasynyň önümçilik desgalaryna ugradyldy.
Hytaýyň nebit uniwersitetiniň (China University of Petroleum) HHR-iň Bilim ministrliginiň ygtyýarlygyndaky öňdebaryjy we iri milli uniwersitet bolup durýandygyny bellemek gerek. Hytaý ýokary okuw mekdebi nebitgaz senagaty ulgamynda pudak üçin täze mümkinçilikleri döredip bilýän hem-de onuň işiniň hilini gowulandyrmak ugrunda innowasion çemeleşmeleri peýdalanmagy başarýan ýokary derejeli hünärmenleriň taýýarlanylmagyny alyp barýar. Uniwersitet Hytaýyň okuw mekdepleriniň arasynda nebit almakda hünärmenleri taýýarlamak boýunça 1-nji orny eýeleýär.
Ý.Kakaýew adyndaky Halkara nebit we gaz uniwersiteti ýokary hünär derejeli işgärleriň taýýarlanylmagyny amala aşyryp, ylym we bilim ulgamynda toplumlaýyn özara bähbitli gatnaşyklary giňeltmek maksady bilen dünýäniň ýurtlarynyň abraýly ýokary okuw mekdepleri hem-de iri pudaklaýyn kompaniýalary bilen hyzmatdaşlykda dünýä akademiki giňişligine işjeň gatnaşýar.
turkmenistan.gov.tm
