Ýakynda Lebap welaýatynyň Halaç etrabynyň merkezi kitaphanasynda halkymyzyň gadymdan gelýän däplerini umumy adamzat gymmatlyklary bilen utgaşdyrmak, ukyply kämil nesli kemala getirmek maksady bilen Türkmenistanyň Magtymguly adyndaky Ýaşlar guramasynyň Lebap welaýatynyň Halaç etrap Geňeşiniň hem-de etrabyň beýleki jemgyýetçilik guramalarynyň guramagynda “Akyldar şahyryň edebi mirasy — umumy adamzat gymmatlygy” atly döredijilik duşuşygy geçirildi.
Duşuşygyň dowamynda Türkmenistanyň Magtymguly adyndaky Ýaşlar guramasynyň Lebap welaýatynyň Halaç etrap Geňeşiniň sanly ulgam boýunça esasy hünärmeni Şirinaý Öwlýagulyýewa, Türkmenistanyň Kärdeşler arkalaşyklarynyň Halaç etrap birleşmesiniň hünärmeni Ýusup Çerkezdurdyýew, Halaç etrap merkezi kitaphananyň hünärmeni Läle Annamyradowa dagylar çykyş etdip, olar geçmiş mirasymyzy öwrenmekde Magtymguly Pyragynyň şygyrlarynyň ýaşlara gymmatly hazyna, görelde mekdebi bolup, türkmen diliniň we edebiýatynyň baýlyklaryny, türkmeniň baý edebi mirasyny, milli däplerimizi özünde jemleýär diýip, öz çykyşlarynda belläp geçdiler.
Duşuşyga gatnaşanlar ajaýyp ýurdumyzyň, milli medeniýetimiziň, mirasymyzyň gülläp ösmegi ugrunda beýik işleri alyp barýan Gahryman Arkadagymyzyň, Arkadagly Gahryman Serdarymyzyň janlarynyň sag, ömürleriniň uzak, beýik işleriniň elmydama rowaçlyklara beslenmegini tüýs ýürekden arzuw etdiler.
Gandym WELLEKOW,
Türkmenistanyň Magtymguly adyndaky Ýaşlar guramasynyň
Lebap welaýatynyň Halaç etrap Geňeşiniň baş hünärmeni.
