.jpg)
Hytaý Halk Respublikasynyň Türkmenistandaky ilçihanasynda Hytaýyň uniwersitetlerine okuwa kabul edilendigi baradaky habarnamalaryň gowşurylyş dabarasy boldy. Hytaýyň hökümetiniň talyp hakly maksatnamasynyň çäklerinde 2025-nji ýyl üçin zehinli türkmen dalaşgärleri dostlukly ýurduň ýokary okuw mekdeplerinde okamaga mümkinçilik aldylar.
Dabarany Hytaý Halk Respublikasynyň Türkmenistandaky Adatdan daşary we Doly ygtyýarly ilçisi Szi Şumin açyp, talyplary hem-de olaryň ata-enelerini gutlady. Ol ak ýol arzuw etmek baradaky çykyşynda ynam bildirýändikleri üçin olara hoşallyk sözlerini beýan edip, Hytaýyň diňe baý medeniýeti we taryhy bolan ýurt däl-de, eýsem, innowasiýalaryň häzirki zaman merkezidigini belledi.
– Siziň okamaga we özboluşly tejribe almaga köp mümkinçilikleriňiz bolar. Hytaý-türkmen gatnaşyklary diplomatik gatnaşyklar ýola goýlandan soň geçen döwrüň dowamynda häzir iň ýokary derejededir. Biziň ýurtlarymyzyň Baştutanlary ýakynda möhüm gepleşikleri geçirip, özara gyzyklanma bildirilýän meseleleri ara alyp maslahatlaşmak bilen geljekki hyzmatdaşlyk üçin esasy ugurlary kesgitlediler – diýip, ilçi nygtady.
Ilçiniň sözlerini Türkmenistanyň Bilim ministrliginiň wekili Ýusup Tuwakow tassyklady. Ol iki ýurduň arasyndaky hyzmatdaşlygyň gadymdan bäri dostluk, hoşniýetli goňşuçylyk we tüýs ýürekden hormat goýmak ruhy bilen tapawutlanýandygyny belledi.
– Biziň döwletlerimiziň Liderleriniň strategik garaýyşlary netijesinde döwletara hyzmatdaşlygy has depginli we netijeli häsiýete eýe bolýar. Şonda halklarymyzyň ynanyşmagynyň, özara düşünişmeginiň hem-de dostlugynyň mäkäm köprüsi bolup çykyş edýän bilim ulgamy aýratyn orun eýeleýär – diýip, Ýusup Tuwakow aýtdy.
Talyplaryň özleri-de Türkmenistanyň we Hytaýyň hökümetlerine hoşallyk sözleri bilen ýüzlendiler. Sinszýan maliýe we ykdysadyýet uniwersitetiniň geljekki birinji ýyl talyby Seýran Kömekow türkmen halkynyň Milli Lideri Gahryman Arkadagymyzyň we hormatly Prezidentimiz Serdar Berdimuhamedowyň ýolbaşçylygynda öňdebaryjy bilimleri almaga ýaşlar üçin giň mümkinçilikleriň döredilýändigini nygtady.
– Şu ýyl maňa Sinszýan-Uýgur awtonom raýonynyň «Kompýuter tehnologiýalarynyň ylymlary (IT)» hünärine bakalawr maksatnamasy boýunça ýokary okuw mekdebine synaglary üstünlikli tabşyrmak hem-de okuwa girmek başartdy – diýip, Seýran Kömekow gürrüň berdi. Şeýle hem ol hormatly Prezidentimiz Serdar Berdimuhamedowyň «Ýaşlar – Watanyň daýanjy» atly kitabyndaky: «Ýaşlar bilim almaga çalyşmaly, Watanymyza wepaly bolmaly we halka ak ýürekden hyzmat etmeli» diýen sözlerini beýan etdi.
Talyp döwrebap bilimlere we ukyp-başarnyklara eýe bolmak bilen özüniň Watanyň bähbidine kompýuter tehnologiýalarynyň kämilleşdirilmegine hem-de sanly ulgamyň ösdürilmegine mynasyp goşandyny goşup biljekdigine ynam bildirdi.
Dabara ýurtlaryň arasyndaky gatnaşyklaryň barha pugtalandyrylýandygyna aýdyň şaýatlyk etdi. Häzir Türkmenistanyň ýokary okuw mekdepleriniň 9-synda müňe golaý talyplarymyz we orta mekdepleriň 10-synda 5700 töweregi okuwçylarymyz hytaý dilini öwrenýärler. Türkmen talyplarynyň 6500-den gowragy eýýäm dürli hünärler boýunça Hytaýyň ýokary okuw mekdeplerinde bilim alýarlar.
Täze 2025-2026-njy okuw ýylynda hyzmatdaşlyk giňeler: HHR-niň Sinszýan-Uýgur awtonom raýony tarapyndan berlen 100 bilim grantlary netijesinde türkmen talyplarynyň 95-si Hytaýda okamaga başlap bilerler.
turkmenistan.gov.tm
